Хоһоон куонкуруһа. Иван Кондаков: «Саҥа сулус»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Кондаков Иван Иванович, Бүлүү, Бөтүҥ

Саҥа сулус

Эмиэ биир чаҕылхай уот сулус умайда

Сахам сирин халлаанын анныгар,

Аан дойду киэлитин барытын сөхтөрө,

Олоххо дьулууру көрдөрө…

Саха ньургун уолана — сэрииһит бастыҥа

Хахайдыы харса суох кииристэ:

Кинилиин өрөгөй кута эҥэрдэстэ,

Эр бэрдэ кыайыыны ситистэ!

Дойдубут былааҕын күөрэччи көтөҕөн,

Саханы эн киэҥник аатыртыҥ,

Өлөр-хаалар күҥҥэ харса суох киирсэн,

Дойдугун эн түһэн биэрбэтиҥ!

Сырдык уонна хараҥа бүппэт мөккүөрэ —

Олох да өлүү үйэлээх киирсиитэ,

Хааннаах өстөөх хара ыар санаата

Сырдык күүстэн умса түспүтэ…

Саха буойун уоланнара,

Эр санаалаах боотурдара,

Өстөөҕү самнара харса суох киирсиҥ,

Ытык иэһи толорон, бары тыыннаах эргиллиҥ!