Хоһоон куонкуруһа. Клавдия Мексярова: «Өрөгөйдөөх Үбүлүөй»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Мексярова Клавдия Алексеевна, Томпо,  Хаандыга

Кыайыы аҕыс уон сыла  —

Өрөгөйдөөх Үбүлүөй,

Кэтэһиилээх дьоро күн

Тиийэн кэлбит кэминэн!

Аҕа дойду сэриитэ

Аанныыр Ийэ дойдуну

Уоттаах сэрии уотунан

Айгыратан ааспыта!

Өстөөх халыҥ үөрдэрэ

Өлөрөөрү, өһөрө,

Урусхаллыы, алдьата

Кимэн кииртэ, адьарай!

Сталин улуу сирдьиттээх

Аҕа дойду сэриитэ,

Норуот бука барыта

Туруммута дьоруойдуу!

Уоттаах сэрии үөһүгэр

Чугуйбакка, хорсуннук

Сэриилэспит дьоннорго

Махтал тылын этиэҕиҥ! 

Тыылга күүскэ үлэлээн

Кыайыы ньыгыл кэккэтин

Бөҕөргөппүт дьоннору

Ахтан-санаан ааһыаҕыҥ!

Үйэлэргэ хаһан да

Умнуллубат Кыайыыга,

Кыһыл былаах күөрэтэн

Сүгүрүйүөх махтана!