Хоһоон куонкуруһа. Марина Яковлева-Куома Куо: «Дьоммут ааттарын үйэтитэ…»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Яковлева Марина Дмитриевна-Куома Куо, Мэҥэ Хаҥалас, 1-кы Баатара

 Дьоммут ааттарын үйэтитэ…

Эбэм Марыына эмээхсин,

Эйэҕэс бэйэлээх киһичээн

Уон иккитэ оҕолонон,

Олортон үһэ эрэ ордон,

Олох олорор дьолломмут.

Сэрии уоттаах дьылларыгар

Соҕотох уола Ыстапаана

Фашистары кытта утарсар

Урусхаллаах сэрии толоонугар

Сырдык тыына быстыбыта.

Кыргыттара барахсаттар

Кыайыы туһа диэн,

Кырдьаҕастары кытта тэҥҥэ

Күүстэрэ тиийэринэн

Холкуос үлэтигэр көмө дьон буолтара.

Кыайыы 80 сылыгар

Кыайыыны уһансыбыттарга,

Сэрии кэмин оҕолоругар

Сүгүрүйэн, махтанан,

Кэлэр кэми түстээтибит.

Олоруохпут биһиги

Дьоммут ааттарын үйэтитэ,

Сайдар сайдам олоххо

Кэнчээри ыччаппыт

Кэскиллэрин кэҥэтэ.