Хоһоон куонкуруһа. Николай Нутчин-Дьуур

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Нутчин Николай Николаевич-Дьуур, Өлүөхүмэ улууһуттан төрүттээх, билигин Дьокуускай куоракка олорор.

/Сэрии сылларыгар тырахтарыыстаабыт ийэбэр Мария Александровна Нутчинаҕа уонна дьүөгэтигэр Мария Трофимовна Татароваҕа аныыбын/

Эдэркээн кэмҥитин талбыта

Уот сэрии ынырык сыллара,

Эдэркээн кыргыттар этигит

Бу бүгүн ордубут эбээлэр.

Убаабыт маҥхайбыт баттаххыт,

Ыстаалын төбөлөөх мэтээлгит,

Эдэр саас кэрэтин билбэтэх

Эрдэлээн кырдьыбыт хараххыт

Элбэҕи эргитэн кэпсииллэр:

Ол сахха эдэр да этигит

Лыҥкынас күлүүгүт туолара,

Долгуннуур оттордоох алааска

Систэри үрдүнэн көтөрө.

Тапталы дьэ кистээн күүтэргит

Ырыаҕа тиһэҥҥит ыллыыргыт,

Хомуска хоһуйан туойаргыт,

Эр бэрдин кэтээҥҥит күүтэргит,

Тэбэнэт мичээри анааҥҥыт

Сүрэҕин долгутан ыларгыт.

Оһуокай иилигэр киирэҥҥит

Чэрдийбит ытыстан   тутуһан,

Дьоллоохтук тэтэрэ кыыһаҥҥыт

Кынаттаах кэриэтэ дайаргыт.

Эмискэ ол күҥҥүт харааран

Уот сэрии ытыллан киирбитэ,

Ситэри эппэтэх тапталгыт

Сүрэххит түгэҕэр сөҥмүтэ.

Уолаттар үлэлэрин туппуккут

ХТЗ тыраахтар ыарахан

Ырычаагын тардан барбыккыт,

Түүннэри үлэҕэ күүрбүккүт.

Ол тимир олбоххо миккиллэн,

Аһаҕас халлааҥҥа олорон

Нап-нарын тарбаххыт чэрдийэн,

Чысхааҥҥа, дьыбарга үрдэрэн

Эрдэлээн сааһыран барбыккыт.

Тырымнас мичээргит кытаатан

Кыайыыга дэһэҥҥит түспүккүт,

Эдэркээн сааскытын элитэн,

Эбээлэр, ийэлэр эһиги.

Төбөбүн төҥкөтөн чиэстиибин,

Кыайыыны уһансыбыт эбээлэр,

Ыстаалын төбөлөөх мэтээлгит —

Эдэркээн саастаргыт бэлиэтэ.

Көрөбүн аҕыйах эбиккит,

Күнтэн күн көҕүрээн иһэҕит,

Эһиэхэ мэҥэ таас чочуйан

Аттыгар ХТЗ туруоран,

Ол онно сибэкки дьөрбөтүн

Тобуктаан ууруохпун баҕардым!