Хоһоон куонкуруһа: Николай Тимофеев-Куола Тылгыны: «1941-45»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Тимофеев Николай Васильевич-Куола  Тылгыны,  Бүлүү, Тылгыны 

1941-45

Ол ааспыт уот сэрии кэмнэрин

Умнуо дуо, баас буолбут сүрэхпит?

Омуннаах тэргэнин дибдиэрин,

Уйулҕа уйгуурбут күннэрин!

Илбиһи иилиммит кыр өстөөх

Хараҥа хаанымсах санаалаах

Ийэ сир иэнигэр сабардыы

Халыйта былыта хаппахтыы.

Алдьархай ааҥнаабыт абатын,

Адьырҕа аҕалбыт аргыарын,

Ааспытын да иһин умнубат

Айыы тыын аймаҕа буолабыт.

Өстөөҕү кытары кыргыһан,

Өһүөнүн утары мөккүһэн,

Өбүгэ барбыта сэриигэ,

Өлөрсөр өргөстөөх иириигэ.

Хабараан хапсыһыы үөһүгэр

Хайыта харбаһыы күөнүгэр

Хайаан да кыайыыга дьулуурдаах

Хаһан да уостубат дьаныардаах.

Кылбайар кыраҕы кырдьыкпыт

Кыайыыга кынаттаан аҕалта,

Дьон-норуот турунан дьулуйбут

Дьулуура сырдыкка салайта.

Кыр өстөөх дойдуттан үүрүллэн

Кыдьыга кырыыска барбыта,

Кыайыыбыт былааҕа кытыастан

Күлүмнүүр күннээххэ күөрэйтэ.