Хоһоон куонкуруһа. Татьяна Потапова-Татыйык Мыла: «Эйэлээх олоҕу алгыаҕыҥ!»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

 

Потапова Татьяна Иннокентьевна-Татыйык Мыла, Дьокуускай

Эйэлээх олоҕу алгыаҕыҥ!

 

Уот сэрии ааспыта ыраатта…

Уораана, дуораана сүппэккэ

Уонунан тыһыынча сүрэххэ

Уоспакка сөҥтөҕө ыарыыта.

 

Суохтар сүтүгэ суох аймахтар.

Эһэтэ, убайа, аҕата

Эргиллэн кэлбэтэх абата

Хаанынан оҕуолуур, санатар.

 

Сураҕа суох сүппүт буойуттар,

Сэриигэ хааннарын тохпуттар,

Биллибэт уҥуоххут ханната,

Хайа сир буоругар хаалбыта.

 

Төһөлөөх ийэҕит, аҕаҕыт

Тохпутай хараҕын ууларын,

Күннэтэ кэтэспит кэргэниҥ,

Тулаайах хаалларбыт оҕоҕут…

 

Бу бүгүн тахсыахпыт парааттыы,

Улуукан КЫАЙЫЫНЫ бэлиэтии,

Бу күҥҥэ Эйигин саныахпыт,

Бойобуой сөлүүтү ытыахпыт.

 

Төбөнү хоҥкутан туруохпут,

Төлөммөт өҥөҕүн чиэстиэхпит,

Тыыннаахтыын, өлбүттүүн хаамсыахпыт,

Болуоссат устунан барыахпыт.

 

Бу Кыайыы туһугар охсуспут,

Бу көҥүл олоҕу тутуспут

Бухатыыр көлүөнэ дьоннорбут

Бүтэрэ, сүтэрэ бу кэлбит…

 

Күн бүгүн фашистар уһуктан,

Сэриини күөттүүллэр саҥаттан,

Эйэлээх олоҕу утаран,

Өлүүнү-сүтүүнү күөдьүтэн.

 

Баҕата хамматах өстөөхтөр,

Бараммат оботтоох куомуннар

Былааннаан көҥүлү тэпсэллэр,

Баһылыы, айбардыы сатыыллар.

 

Адьарай үөр бөрө түмсүүлэр

Аһынар диэн тугун билбэттэр,

Алдьатар, өһөрөр иҥсэлэр

Алдьархай ааннарын астылар.

 

Сир дьоно, уһуктуҥ, түмсүөҕүҥ,

Хара дьай күүстэрин өһүлүҥ,

Хаанынан төлөммүт олоҕу,

Сир ийэ кэскилин қөмүскээҥ!

 

Сүһүөхтээх бэйэбит туруоҕуҥ,

Хоолдьуктаах бэйэбит хоҥкуйан,

Сэриини, өлүүнү утаран

Эйэлээх олоҕу алгыаҕыҥ!