Хоһоон куонкуруһа. Зоя Старостина-Кичэкэ: «Кыайыы…»

“Саха сирэ” хаһыат (sakha-sire.ru) Кыайыы 80 сылынан  төрөөбүт дойдуга тапталы иҥэрэр, дойдуга бэриниилээх буолууга иитэр соруктаах хоһоон куонкуруһун биллэрбитэ. Өрөспүүбүлүкэ үгүс улуустарыттан куонкуруска уопсайа 76 кыттааччы  кытынна. Олортон бастыҥ хоһооннору талан саайтка ааҕааччыларбытыгар анаан таһаарабыт. Кыайыылаахтар ааттарын  муус устарга билиэхпит.

Старостина Зоя Ильинична-Кичэкэ, Үөһээ Дьааҥы, Суордаах

Кыайыы…

Халлааным аҕата

Харыстыы бүөбэйдээн,

Ыллыкка киллэрэн

Эйиэхэ тиэрпитин

Махтанар эбиппин.

Ыарахан  сэрииттэн,

Ыанньыйбыт санаабын

Ымыылаах чыычааҕым

Ырыанан дьиэгэтэн,

Ыраастыыр эбиккин.

Кыайыы —

Эйиэхэ баар эбит

Айылҕа симэҕэ:

Эйэҕэс сиккиэрэ,

Улуу долгуна,

Бааллырар бааллара.

Кыайыы —

Уот кыымын сылааһа.

Тоҥ мууһу уулларыах

Итии тыына,

Өрөгөй күнэ,

Сүрэххэ сылдьаҕын.

Кыайыы маҥан холууба

Сырдык сүүмэх кэриэтэ,

Саппаҕырар күннэрбэр

Сандаарыйа сырдыыгын,

Өрөһүйэн ылаҕын.

КЫАЙЫЫ — барахсан күүтүүлээх,

Харах уулаах, ынчыктаах,

Хаан сыттаах, көлөһүннээх,

Тургутуулаах, өлүүлээх.