Хоһоонньут Эрчим Николаев

2024 сылы дойдубут бэрэсидьиэнэ Владимир Путин Дьиэ кэргэн сылынан биллэрбитэ. Маны дьон-сэргэ бэркэ биһирии көрүстэ. Кырдьыга даҕаны, оҕолорбут барахсаттар — биһиги инники кэскилбит буолаллар. Кинилэр кыра эрдэхтэриттэн этэҥҥэ улаатан, дойдуга, норуокка туһалаах дьоҥ буоллахтарына — ол биһиги дьолбут!

Мин бүгүҥҥү кэпсиир дьоруойум — Эрчим Николаев, Амма улууһун Эмис нэһилиэгин Күннүк Уурастыырап аатынан орто оскуола ахсыс кылааһын үөрэнээччитэ.
Эрчими кытта мин куйаар ситимин нөҥүө билсибитим уонна тута испэр киллэрэн, кини суруйууларын, хоһооннорун мэлдьи ааҕабын.
Эрчим Николаевтан кылгастык бэйэтин билиһиннэрэригэр көрдөспүтүм. Онуоха кини бу курдук кэпсиир:
— Мин бэс ыйын 13 күнүгэр 2008 сыллаахха Амма улууһун Эмис нэһилиэгэр Аграфена Константиновна, Павел Петрович Николаевтар дьиэ кэргэҥҥэ үһүс оҕонон күн сирин көрбүтүм.
Билигин ахсыс кылааска үөрэнэбин. Бастакы хоһооммун 6 саастаахпар суруйбутум. Уус-уран ааҕыы, толоруу көрүҥнэригэр уһуйааччым — Иванова Валентина Ивановна. Быйыл 4 хоһоонум «Кэрэ эйгэ» түмсүү иһинэн Зоя Егоровна Аржакова таһаартарбыт Ийэ, Аҕа, Дьол, Үлэ туһунан хомуурунньуктарыгар киирдэ.
Мин ытыктыыр, тумус туттар, сөбүлээн ааҕар суруйааччым биир дойдулааҕым, убайым Владимир Михайлович Новиков — Күннүк Уурастыырап буолар. Кини хоһооннорун, чабырҕаҕын ааҕан, элбэхтэ дипломант, лауреат буолбутум. Ону тэҥэ сылын ахсын ыытыллар биир дойдулаахпыт, айар куттаах Соловьёва Александра Спиридоновна истипиэндьийэтин ылбытым. Быйыл Аҕа дойду Улуу сэриитин бэтэрээнэ Илья Николаевич аатынан истипиэндьийэ хаһаайына буоллум.

Эрчим Николаев иллэҥ кэмигэр айылҕаҕа сылдьарын, хоһоон айарын, сибэкки үүннэрэрин, ийэтигэр көмөлөһөн ас астыырын сөбүлүүр. Маны таһынан кини өссө уруучуканы, значогу, вымпелы мунньар.
Эрчим инники былаана — үчүгэйдик үөрэнэн суруналыыстыка салаатыгар үөрэххэ киирии. Ити туруоруммут сыалын ситиһээри «Кэскил», «Амма олоҕо» хаһыаттарга тэттик суруйуулары ыытар, оскуола, дэриэбинэ сонуннарын сырдатар. Суруналыыстыка туһунан аан бастаан билиһиннэрбит учууталыгар Анетта Николаевна Гаврильеваҕа Эрчим махталын тириэрдэр.
Дьэ, ити курдук кэскиллээҕи кэпсиир, сырдыгы ыраланар Эрчим Николаев!

Мантан аллараа Эрчим хоһооннорун билсиҥ:

Уолаттарбыт эрэллэрбит

Олус диэн минньигэстэр.
Оҕолорбут кэскиллэрбит.
Ойон тураат сырсаллар.
Олбуор тула сүүрэннэр
Окко хонууга сытаннар
Оттомуран ылаллар.

Онтон күнүс тураннар
Оҕуруокка уу куталлар
Оҕурсуну хомуйаары
Оҕолорбут сүүрэллэр
Онтон хайҕал ыланнар
Олуһун диэн үөрэллэр.

Талах тыаҕа тахсаннар
Ынах, сылгы үүрсэннэр
Ыамҥа тэҥҥэ сылдьаннар
Ынах ыыры көрөннөр,
Боппуруоска харда ылан,
Билиилэрин эбинэллэр,

Самаан сайын айылҕаҕа
Сиэрэм күөххэ үктэнэ
Сиккиэр тыалга уйдаран
Сардааналаах кырдалга,
Сиэттиһэллэр сүүрэллэр
Сэргии сэҥээрэ көрөллөр.

Махтал буоллун эһэбэр

Ытык ыал өһүөтэ
Дьиэ кэргэн эрэлэ
Өбүгэм удьуорун ситимэ.
Эһэкэм эстибэт эрчимэ

Олох кыра сааһыттан
Оҕус сиэтэн улааппыта
Дьону кытта тэҥҥэ хамсаан.
Үлэ күүһүн билбитэ.

Суоппар идэтин баһылаан.
Тимир көлө аргыстанан
Сэбиэскэй кэмнэ кыайыылаах
Үлэлээтин албан ааттанан.

Эргитэ саныыгын билигин.
Эриирдээх олоҕуҥ суолун
Ахтан-санаан кэпсиигин
Күүстээх үлэҥ туоһутун.

Холобур буолар олоҕун
Үлэҕэ угуйда миигин
Киниттэн көстүө мин-дьолум
Эһиэхэ, эһээбэр махталым

Елена Прокопьева, уопсастыбаннай кэрэспэдьиэн