Холорук туһунан

Сахалар холорук туһунан үгүстүк истэллэр.

«Холорук түстэ», «холорук курдук», «холорук ытыйбытын курдук» диэн кэпсэтэр тылларыгар үгүстүк тутталлар.

Мин оҕо эрдэхпинэ, холкуос сиэмэтин ытыйан таһаарбытын санаан кэлэбин. Кыра сылдьан сайылыктарынан, былыргы өтөхтөрүнэн үгүстүк сылдьааччыбын. Онно хантан да кэлбитэ биллибэккэ, холорук баар буолан хаалааччы. Сороҕор титииккэ да баар буолааччы. Маайа диэн кырдьаҕастаах этибит, кини «холорукка утары тарбаххытынан кириэстэ тутуҥ» диэччи. Кыра соҕус холорук оннукка утары сүүрэн кэлэн иһэн хаптас гынан хаалааччы. Кэлин Верхоянскайга ыһыахтыы сылдьан эмиэ оннук холоругу көрөн турабын.  Улахан холорук түстэҕинэ, мутугу тоһутан кириэстии тутарбыт. Кэлин өйдөөбүтүм, «мин — күн оҕотобун» диэн өйдөбүллээх эбит.

А.С.Федоров,

«Саха ыалын сиэрэ-туома» («Айар», 2023 с.) кинигэтиттэн.

Саха ыалын халандаарыттан ылылынна («Айар»).