Киһини өлөрүүгэ уорбаланааччылары туттулар

ИДьМ Өймөкөөн улууһунааҕы салаатын холуобунай ирдэбил үлэһиттэрэ РФ ХК 111 ыст. 4 ч. буруйу оҥорууга уорбаланааччылары туттулар.

Быйыл ыам ыйыгар олохтоох эр киһи полицияҕа кэлэн 58 саастаах билэр киһитэ сүппүтүн туһунан иһитиннэрбит. ИДьМ Өймөкөөн улууһунааҕы салаатын холуобунай ирдэбил үлэһиттэрэ суһал-көрдүүр үлэни ыытан, киһини улаханнык эчэтэн өлөрүүгэ тириэрдибит икки уорбаланааччыны туппуттар.

Барыллаан быһаарыллыбытынан, Өймөкөөн улууһун Аартык бөһүөлэгэр баар гарааска буолбут иирсээн кэмигэр бу дьон эр киһини охсуталаабыттар.

Билиҥҥитэ буруйданааччылары СӨ силиэстийэлиир кэмитиэтин оройуоннар икки ардыларынааҕы Дьокуускайдааҕы-Илиҥҥи силиэстийэлиир салаатыгар туттарбыттар. Биирдэрин суут быһаарыытынан хаайбыттар (под стражу), иккис киһини хаайарга суукка хадатаайыстыба суруйбуттар. Холуобунай дьыаланы силиэстийэлээһин салҕанар. Бу туһунан СӨ ИДьМ пресс-сулууспата иһитиннэрэр.