“Хомунаалынай өҥө төлөбүрэ ыарыы илик”

Дьокуускайга уонна өрөспүүбүлүкэ оройуоннарыгар элбэх кыбартыыралаах дьиэ олохтоохторо бары дьиэ-уот хомунаалынай өҥө төлөбүрүн төлүүр ытык эбээһинэстээхпит. Онон олохтоохтору хомунаалынай өҥө төлөбүрэ хаһан, төһө үрдүүрэ олус долгутар. Иэс-күүс мунньуллара дьиэлээх киһиэхэ кирэдьиити төлүүр кэриэтэ ыарахан, оттон ресурсанан хааччыйар тэрилтэ иэс түмүгэр хааччыйыытыгар оҕустарар. Ол түмүгэр кыстыкка ыарахаттары көрсүөххэ сөп.

Бу атырдьах ыйыгар “хомунаалынай өҥө төлөбүрэ улаап­пыт” диэн сурах тарҕанна. Сайыҥҥы кэмҥэ сыана үрдээбэт диэн иһитиннэрии тарҕаммыта, хайдах буоллаҕай диэн,  ону чопчулаары СӨ Сыана бэлиитикэтигэр судаарыстыбаннай кэмитиэтиттэн туоһуластыбыт.

– Хомунаалынай өҥөлөргө тарыыптары 2022 сыл ахсынньы 1 күнүгэр үрдэтии (индексация) оҥоһуллубута. Уонна бу олохтоммут тарыып 2024 сыл от ыйын 1 күнүгэр диэри туһаныллар. Маннык ирдэбил бүтүн Арассыыйа үрдүнэн олохтоммута. Онон ити ыйыллыбыт болдьоххо диэри хому­наалынай өҥөҕө тарыыбы үрдэтии көрүллүбэт. Биһиги кэмитиэппитигэр дьон үҥсүү, быһаарыы ирдээтэҕинэ, онно хоруйдуубут. Сорохтор хомунаалынай төлөбүрү сыыһа аахтылар, бэрэбиэркэлээҥ диэн туруорсаллар. Кырдьык, ханнык эрэ ыйга өҥөнөн аһары туһаннахтарына, төлүүр суумалара элбээн тахсар буоллаҕа, счетчиктаахтар ол счетчик ыйыытыгар олоҕуран төлүүллэр, – диэн чопчу­лаата СӨ Сыана бэлиитикэтигэр судаарыстыбаннай кэмитиэтин Туһанааччы ырыынагын уонна түмэр үлэҕэ отделын сала­йааччыта Элеонора Анваровна Фаизова.

Онон, күндү ааҕааччыларбыт, сымыйа сурахтарга итэҕэйимэҥ.  Хомунаалынай өҥө төлөбүрэ ыарыы илик.

“Биирдэ баттаан”

Үөһээ этиллибитин курдук, ааспыт сыл саҥатыгар ресурсанан хааччыйар тэрилтэлэртэн уонна салайар хам­паанньалартан уонна хапы­таалынай өрөмүөн пуондатыттан иһитиннэриилэри түмүүгэ өрөспүүбүлүкэтээҕи электроннай сервиһи туһаныы саҕаламмыта. Дьокуускай куоракка өҥөнөн туһанааччылар “биирдэ баттаан” төлөбүр киллэрэллэрэ олохтоммута. Сервис e-yakutia.ru судаарыстыбаннай уонна муниципальнай өҥөлөр биир кэлим порталларыгар киирбитэ.

Ити кэнниттэн 2022 сылга бырайыак киин куораппытыгар үлэлээбитэ. Онон дьон сэргээн, сыыйа өрөспүүбүлүкэ оройуоннарыгар киллэрэргэ быһаарыллыбыта.

Билиҥҥи туругунан өрөс­пүүбүлүкэ Дьиэ-уот хомунаалынай хаһаайыстыбатын уонна Энэргиэтикэ министиэристибэтин уонна тустаах сервис киириэхтээх оройуоннарын кытта дуогабардары түһэрсэллэр. Алдан, Ленскэй, Нерюнгри, Мииринэй, Өлөөн эбэҥки национальнай оройуона, Мэҥэ Хаҥалас, Нам, Хаҥалас улуустара, “Жатай” куораттааҕы уокурук киирсэллэр.

“Коммунтеплосбыт” Мэ­ҥэ Хаҥаластааҕы учаастагын начаалынньыга Мария Гер­­мо­генова этэринэн, бу он­лайн көрүҥүнэн үксүн үлэ­лиир дьон уонна эдэрдэр туһанал­лар. Оттон биэнсийэлээхтэр, аҕам саастаах дьон итинник төлөбүргэ киирэртэн туттуналлар. Ууларын счетчигын көрдөрүүтүн эҥин бэйэлэрэ аҕалан биэрэллэр, сыыһа-халты төлүөхпүт диэн дьаахханаллар, сорохтор биэнсийэлэрин уу харчынан ылар да буолан, итинник төлүүллэр эбит.

Хомунаалынай өҥөлөргө тарыыптары 2022 сыл ахсынньы 1 күнүгэр үрдэтии (индексация) оҥоһуллубута. Уонна бу олохтоммут тарыып 2024 сыл от ыйын 1 күнүгэр диэри туһаныллар. Маннык ирдэбил бүтүн Арассыыйа үрдүнэн олохтоммута. Онон ити ыйыллыбыт болдьоххо диэри хому­наалынай өҥөҕө тарыыбы үрдэтии көрүллүбэт.

Сорох уу харчынан төлөтөр

Хомунаалынай өҥөнү төлөөһүн эгэлгэтэ элбэх. Төлүүр харчылааҕыҥ диэн кырата. Ити үөһээ этиллибитин курдук, сорох онлайн төлүүр, сорох бэйэтэ ДЭК хампаанньаҕа тиийэн төлүүрүн ордорор. Ол төлөөһүн эрэйэ элбэх. Хайа эрэ салайар хампаанньа төлөбүрүн ДЭК каассатыгар уу харчынан эрэ төлүүгүн. Холобура, “Якутпромсервис” киэнин (салайар хампаанньа итинник төлөтөр дииллэр). Онон сороҕор уу харчы устубакка кэлбит дьон таах төннөр. Сорох хампаанньаларга төлөбүрү каартанан да, уу харчынан да төлүөххэ син.

Салайар хампаанньалартан “Трансстрой” хампаанньа төлөбүрү хомуйууга кытаанахтык ылсыбыт. Манна төлөбүргэ иэстээхтэргэ юридичес­кай отделтан эрийэн, эрдэттэн сэрэтэллэр, төлүүрэ кыаллыбатаҕына, кыбартыыралаах ха­­һаайыҥҥа сөптөөх усулуобуйанан уһатан төлүүрүгэр эҥин кыаҕы биэрэллэр. Аны туран сорох хааччы­йар хампаанньалар быһаччы дуогабарга көһүүгэ киирэллэр эбит. Оччоҕо тустаах аадырыс олохтооҕо араас поставщиктары кытта быһаччы дуогабарга көһүөхтээх. Ол туһугар доку­муонун тутан, барыларын кэри­йэн, дуогабар түһэрсиэхтээх. Саамай сылаалаах ити дии саныыбын. Кырдьаҕас дьон итинник дуогабар түһэрсээри төһө эрэйдэнэллэрэ буолуой? Киһиэхэ барытыгар докумуоннарын эккирэтиигэ социальнай үлэһит көрүллүбэтэ чахчы.

Маннык дуогабарга олоҕуран салайар хампаанньа сала­йыы өҥөтүн толоруох­таах уонна дуогабарын болдьоҕо бүтүөр  диэри бас билээччилэр уопсай баайдарын-дуолларын сөптөөхтүк көрүөхтээх-ис­­тиэхтээх.  Онон билигин элбэх кыбартыыралаах үгүс дьиэлэргэ сырыттахха, дуогабарда түһэрсиҥ диэн биллэрии бөҕө ыйаммыт.

Онон, төлөбүр үрдээбэтэх диэн уоскуйбакка, ыйдааҕы төлөбүрбүтүн кэмигэр төлүөхтээхпит.

Субсидия, кешбэк

Өскөтүн дьиэ-уот хомунаалынай өҥөтүгэр ороскуот дьиэ кэргэн дохуотун 15 быр. тахсар түгэнигэр, дьон субсидия ылар бырааптаах. Субсидия харчынан аадырыстаах көмө быһыытынан бэриллэр. Онон маны толорторорго өрөспүүбүлүкэтээҕи Субсидия ааҕыныстыбатыгар тиийиэхтээххит.  Субсидия оҥорор филиаллар улуустар кииннэригэр эмиэ бааллар. “Мои документы” МФЦ исписэлиистэрэ көмөлөһөллөр.

Саха сирин олохтоо­ҕун каартатын туһанан хомунаалынай өҥөнү “Түмүллүбүт төлүүр докумуон” (Объединенный платежный документ – ОПД) нөҥүө төлөөбүт киһи билигин төлөөбүт хамыыһыйатын сыанатын кешбэк нөҥүө төннөрөр кыахтанна дииллэр.

Кешбэги ылар туһугар Саха сирин олохтооҕун каартата баар буолуохтаах эбит. Уонна хомунаалынай өҥөҕүн e-yakutia.ru порталга ОПД сервиһин нөҥүө төлүөхтээххин.

Кешбэк ый хас бэһис үлэ күнүн аһарбакка эрэ каартаҕа түһэр.