Хомус алгыстаах түһүлгэтигэр

Хомус күнүнэн сибээстээн, сэтинньи 29 күнүгэр, саха эстрадатын театрын камернай саалатыгар аан дойдутааҕы виртуоз хомусчут Дьүрүйээнэ Кривошапкина уонна артыыс, блогер, хомусчут Владимир Дормидонтов «Уһуктуу» диэн ааттаах айар кэнсиэртэрэ буолла.

Дьиҥнээх сахалыы тардыы хомуһун дуоһуйа иһиттибит. Хас биирдии кэлбит көрөөччү хомус дьүрүскэн тыаһыттан алҕанна. Дьүрүйээнэ, Владимир бииргэ, тус туспа айбыт дьүһүйүүлэрин олус кэрэхсээтибит. Мин урукку өттүгэр хомус кэнсиэрин хаһан да сылдьан истэ иликпин, ол иһин куйаарга тиийэр хомус дорҕоонуттан олус астынным.
Артыыстары СӨ үтүөлээх артыыһа Саарын кэлэн эҕэрдэлээтэ уонна икки ырыатын Дьүрүйээнэ хомуһунан доҕуһуоллаата. Онно Саарын: «Дьүрүйээнэ саха артыыстарыттан саамай элбэх дойдунан сылдьан бэйэтин хомуһунан элбэх бырайыактарга кыттан кэнсиэрдэргэ кытынна. Маастарыстыбата сайдан иһэр, элбэх дьону хомуска үөрэтэр. Олортон үгүс  үөрэнээччитэ биллэр хомусчут буолан эрэллэр», — диэн эттэ.
Манна эбэн эттэххэ, Владимир Дормидонтов Дьүрүйээнэни кытта 10 сааһыттан билсэр эбит. Кини төрүт оҕо эрдэҕитэн хомусчут, улахан сценаҕа 10 сааһыттан хомуска оонньуур. Быйыл кыттыһан Алма Атаҕа, Бишкеккэ үрдүк таһымнаахтык кэнсиэртээн кэллилэр.

Дьүрүйээнэ ырыа айааччы, тойуксут, чабырҕахсыт, үҥкүү тылын этээччи. Саха фольклорун оҕо эрдэҕиттэн иҥэринэ сылдьар талааннаах виртуоз хомусчуппут буолар.
Кэнсиэргэ элбэх ыччат, сахалары сэргэ нуучча көрөөччүлэрэ эмиэ сырыттылар. Кэнсиэр бүппүтүн кэннэ биир нуучча дьахтара  миигиттэн Дьүрүйээнэ норуодунай артыыс дуо диэн ыйытта. Ону мин кини ити  үрдүк аакка  чахчы толору эппиэттиир хомусчут, биһиги норуот ону биир санаанан өйүүбүт диэтим. Онуоха кини кырдьык, норуот таптала быһаарыыта ол диэтэ.
Инникитин, Дьүрүйээнэ камернай саалаҕа чаастатык кэнсиэртиир, бэйэтин олоҥхотун ситэрдэҕинэ,  айар киэһэтин ыытарга былаанныыр. Кэтэһэбит, эн улахан кэнсиэргин, күндү Дьүрүйээнэ!

Марта Николаева