«МУУС УСТАР»: «Хомус тэтимэ» куонкуруска Егор Никифоров бастаата

Амма оройуонун историяҕа учуутала Егор Никифоров «Муус Устар» V ыччат бэстибээлин чэрчитинэн Российскай Федерация үтүөлээх артыыһа, аан дойду виртуоһа Петр Оготоев аатынан хомуска толорооччулар куонкуруһун кыайыылааҕынан буолла.

«Дьүүллүүр сүбэ кини хомуска толоруутун саамай чаҕылхайынан бэлиэтээтэ. Финалга барыта 10 толорооччу таҕыста. Хас биирдии кыттааччы үчүгэй толорууну көрдөрдө уонна көрөөччүлэр сүргэлэрин көтөхтө», – диэн тэрийээччилэр иһитиннэрдилэр.

Иккис миэстэни Үөһээ Бүлүүттэн Степан Сергеев, үһүс миэстэни Дьокуускайтан Михаил Котельников ыллылар. Эспиэрдэр кыттааччылары хас да киритиэрийинэн сыаналаатылар: хомуска оонньуур маастарыстыбаны, араас муусука үнүстүрүмүөннэрин кытта хомус дьүөрэлэһиитин, композицияҕа тиэмэтин арыллыытын, о.д.а.

Санатан эттэххэ, кулун тутар 17 күнүттэн «Муус Устар-2025» ыччат пуорумун сүүмэрдиир түһүмэҕэ саҕаланна. Саха сирин бары оройуоннарыттан Дьокуускайга муниципальнай түһүмэхтэр кыайыылаахтарын 3 тыһыынча кэриҥэ кыттааччыта түмсэр. Быйылгы бэстибээл 12 хайысханан ыытыллар, 20-тэн тахса куонкурустаах, үөрэх былаһааккалаах уонна сиэссийэлээх.

#МУУСУСТАР2025