Хомустаах талба талааннаах далбар хотуна Алена Томская

Бэҕэһээ, алтынньы 23 күнүгэр, Д.Ф. Алексеев аатынан 1 Хомустаах орто оскуолатын саха тылын уонна литературатын үрдүк категориялаах учуутала Алена Алексеевна Томская «Тыл, литература, театр ситимэ» үбүлүөйдээх авторскай сэминээрин улуус таһымыгар үрдүк тэрээһиннээхтик ыытта.

Алена Томская «Хомустаах Ньургуннара» тыйаатыр салайааччыта, РФ уонна СӨ үөрэҕириитин туйгуна, улуустааҕы «Эҥсиэли» хаһыат «2023 сылга бастыҥ юнкор салайааччыта», оскуола иһинээҕи «2023 сыл бастыҥ наставнига», нэһилиэктээҕи «2024 сыл бастыҥ учуутала» анал ааттар хаһаайыннара диэн Нам улууһун дьаһалтатын пресс-сулууспата иһитиннэрэр.

«Хомустаах Ньургуннара» түһүлгэ холобуругар көрдөрүллүбүт тэрээһиҥҥэ улуус оскуолаларын саха тылын, литературатын учууталлара уонна тыйаатырдарын салайааччылара кыттыыны ыллылар. Сэминээр Айыы Сандалы алгыс сиэрин-туомун толоруутунан арылынна. «Тыйаатыр кэрэ эйгэтигэр айан…» бырайыагы оскуола дириэктэрэ Ульяна Атласова сиһилии билиһиннэрдэ. Салгыы Алена Алексеевна ыалдьыттары «Тыйаатыр быыһын сэгэтэн …» түһүмэххэ ыҥырда.

Эбиэт кэмэ олус уратытык, дьиҥ сахалыы тыыннаах барда. Олохтоох «Илгэ» кэпэрэтиип салайааччыта Ольга Сивцева, асчыт мааныта Полина Винокурова «Сиэдэрэй сандалы» гастротеатрга сылаастыы, тутатына бэлэмнэммит саха бастыҥ астарынан – отонноох күөрчэҕинэн, алаадьынан, ыһаарыламмыт сүөһү мэйиилээх бутербродунан, саламаатынан, куобах эттээх соркуойунан, дөлүһүөннээх чэйинэн күндүлээн дуоһуттулар. Минньигэс амтаннаах сибиэһэй аһы ыалдьыттар астына амтаһыйдылар.

Олохтоох сынньалаҥ киинин методиһа Елена Руфова П.П. Ядрихинскай-Бэдьээлэ «Дьырыбына Дьырылыатта Кыыс Бухатыыр» олоҥхо ырыатын-тойугун кыайа-хото тутан толорон истээччилэри сэргэхситтэ. Эбиэттэн киэһэ Алена Алексеевна «Олох тыыннаах лоскуйдара …» диэн киинэни, муусуканы, тыйаатыры алтыһыннаран үөрэтии көдьүүһүн туһунан өр сыллаах уопутун атастаста. Тыйаатыр иитиллээччилэрэ Чаҕылҕан, Семен Данилов, Н. Федотов, Өксөкүлээх Өлөксөй, Алампа, Н. Неустроев, П. Ойуунускай – «Ытык дьоннуун сэһэргэһии», Н. Лугинов «Улуу Хууннар», Чаҕылҕан тылбааһыгар А.С. Пушкин «Моцарт уонна Сальери» айымньыларынан дьүһүйүүлэри көрдөрдүлэр.

Директоры үөрэх чааһыгар солбуйааччы Татьяна Стручкова иилээн-саҕалаан ыыппыт билиҥҥи кэм ирдэбилинэн оскуола тыйаатырын курдук уустук үлэни тэрийии туһунан атах тэпсэн олорон сэһэргэһиитигэр, санаа үллэстиитигэр үгүс үтүө тыл этилиннэ. Алена Алексеевнаҕа өр сыллаах таһаарыылаах, айымньылаах үлэтэ үрдүктүк сыаналанан, «За вклад в развитие 1 Хомустахского наслега» бэлиэ үөрүүлээх быһыыга-майгыга туттарылынна.