Хомустаахха биэлсэр-акушер пуунун дьиэтэ тутуллуоҕа

Уус Алдан улууһун Хомустаах сэлиэнньэтигэр  биэлсэр-акушер пуунун модульнай дьиэтин тутуу саҕаланна. Саҥа дьиэ “Доруобуйа харыстабыла”   национальнай бырайыак бастакы сүһүөх звенотун модернизациялааһын бырагырааматынан тутуллуоҕа.

Биэлсэр-акушер пуунун тутарга  уопсайа  6 мөлүйүөн солкуобай көрүлүннэ. Эбии 3,5 мөлүйүөн суумаҕа мэдиссиинискэй тэриллэри уонна миэбэллэри атыылаһыахтара.

Хомустаах нэһилиэнньэтигэр маҥнайгы мэдиссиинискэй көмөнү  биэлсэр оҥорор. Манна 376 киһи олороруттан, 108 – оҕо.  Биэлсэр-акушер пууна  аныгы мэдиссиинискэй тэриллэринэн хааччыллыаҕа уонна Оройуоннааҕы балыыһа быраастарын кытары ыраахтан сүбэ-ама ылар кыахтаныаҕа.

Саҥа дьиэни  быйыл  балаҕан ыйын саҥатыгар тутан бүтэрэргэ былаанныыллар. Уус Алдан улууһун олохтоохторо уонна эмчиттэрэ биэлсэр-акушер пуунун  саҥа дьиэтэ тутуллан үлэҕэ киирэрин күүтэллэр.