Хомуурга хабыллыбыттар үлэлэрин миэстэтэ мэктиэлэниэҕэ

Хомуурга хабыллыбыттар уонна бэйэ баҕатынан байыаннай эпэрээссийэҕэ кыттыыны ылааччылар үлэлээх буолуулара мэктиэлэниэҕэ. Үлэ дуогабара көтүрүллүбэт, сулууспа болдьоҕун кэмигэр эрэ тохтотуллар.

Бүгүн балаҕан ыйын 27 күнүгэр Судаарыстыбаннай Дума дьокутааттара хомуурга хабыллан сулууспалыы барбыттарга биитэр баҕа өттүнэн байыаннай хантараак түһэрсибиттэргэ үлэ миэстэтин мэктиилиир туһуттан РФ Үлэ кодексатыгар уларытыы киллэрдилэр.

«Бүгүҥҥү ылыныллыбыт сокуоннар хомуурга хабыллыбыттар уонна доброволецтар үлэлэрин миэстэтин мэктиэлиэхтэрэ. Байыаннай сулууспа кэмигэр үлэлэрэ, дуоһунастара,  үлэ социальнай бары мэктиэлэрэ оннунан хаалаллар», — диэтэ Госдуума Бэрэссэдээтэлэ Владислав Володин.

Сокуон быһыытынан үлэ дуогабарын тохтотуллубут болдьоҕо ыстааска ааҕыллар. Аны туран, сулууспалыы сылдьар дьонноох дьиэ кэргэттэри бэйэлэриттэн сөбүлэҥэ суох командировкаҕа ыытар, түүҥҥү кэмҥэ, эбии бириэмэҕэ, өрөбүллэргэ, бырааһынньыкка үлэҕэ ыҥырар көҥүллэммэт. Ыстааты сарбыйыыга эмиэ түбэспэттэр.

Сокуон олунньу 24 күнүттэн балаҕан ыйын 21 күнүгэр диэри дуогабардара көтүрүллүбүт (а.э. «уурайбыт») сулууспалааччылар урукку үлэлэригэр бастакы уочарат хос киирэллэрин эмиэ ирдиир.