Хоноҕор бибилэтиэкэтигэр кыргыттарга аналлаах тэрээһин буолла

Кыргыттар аан дойдутааҕы күннэринэн бүгүн Уус Алдан улууһугар Хоноҕор бибилэтиэкэтигэр тэрээһин буолла.

Манна тиэхиньикум үөрэнээччилэрэ — устудьуон кыргыттар кыттыыны ыллылар. Бэлиэ күҥҥэ бибилэтиэкэ пуондатыттан кыргыттарга аналлаах литератураны билиһиннэрии, бырааһынньык суолтатын, историятын иһитиннэрии, бэсиэдэ болҕомтону тарта.

Маны тэҥэ «Илии сылааһа» байыаннай дьайыы кыттыылаахтарыгар анаан харысхаллаах кыра сыттыктары тигэн оҥорууга маастар-кылаас ыытылынна. Манна тэрийээччи, педагог Л.П.Заровняева кыргыттары үөрэттэ. Кыргыттар тэрээһиҥҥэ олус көхтөөхтүк кытыннылар, сэргэхсийдилэр, харысхаллары тигэн, үөрэн-көтөн тарҕастылар. Тэрээһиҥҥэ барыта 20 киһи сырытта.

Ирина Осипова

Хаартыскалар ааптар тиксэриилэрэ.