Хоптоҕо нэһилиэгэр Бырабыыталыстыба отчуотугар 100-чэкэ киһи муһунна

Бүгүн, олунньу 26 күнүгэр, күн иккис аҥаарыгар Чурапчы улууһун Хоптоҕо нэһилиэгэр СӨ ситэриилээх былааһын отчуота саҕаланна.

Бырабыыталыстыба Бэрэссэдээтэлин бастакы солбуйааччы Дьулустаан Борисов салайар бөлөҕүн отчуотугар Хоптоҕо нэһилиэгин олохтоохторо саалаҕа толору муһуннулар. Ону бастакы бөлөҕү салайар Тыа хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова дакылааттыан иннинэ хайҕаата. Ол курдук, Бырабыыбалыстыба отчуотун 100-кэ киһи истэ, дьүүллэһэ кэлбитэ билиннэ.

Биллэрин курдук, бу нэһилиэккэ уопсайа 423 ыал олорор. Ол иһигэр 49 элбэх оҕолоох ыал баар. Сахаяна Павлова дакылаатын истэн баран, Семен Сергеев Бырабыыталыстыба отчуотун «Саха сирэ» хаһыакка аахпытын бэлиэтээн туран, отчуот ис хоһоонунан тус ыйытыыларын биэрдэ. Чуолаан, аҕам саастаахтар судаарыстыбаннай өҥөнөн араас дьыалалары быһаарсалларыгар табыгаһа суоҕун ыйда.

Кулууп дириэктэрэ Кирилл Пестерев саҥа кулууп  уонна уһуйаан эбийиэктэрин тутууларын туруоруста. Эдэр аҕа оҕо уһуйаанын тутуута күүскэ барыан наадалааҕын бэлиэтээн туран, ситэриилээх былаас ыытар үлэтин сөптөөҕүнэн аахта.