Хоро — Чаллыр — Бүлүү өрүс  хайысхатынан  суолу көннөрүүгэ 2 автогрейдер үлэлиир

Бу күннэргэ  өрөспүүбүлүкэ үгүс улуустарыгар ардах, инчэҕэй хаар түһэн,  ордук айанньыттар харгыстары көрүстүлэр. Хоро — Чаллыр — Бүлүү өрүс  хайысхатынан   федеральнай суолу көннөрүүгэ 2 автогрейдер үлэлиир диэн Үөһээ Бүлүү улууһун баһылыга иһитиннэрдэ.

-Бу күннэргэ «Бүлүү» федеральнай суол уһун ардахтар кэннэ алдьанан, айан массыыналара элбэх кыһалҕалары көрүстүлэр. Иллэрээ күн, алтынньы 1  күнүгэр,  «РИК Автодор» тэрилтэ погрузчига суолу чөлүгэр түһэрии, батыллыбыт массыыналарга көмөнү оҥоруу үлэтин саҕалаабыта. Бүгүн суолу көннөрүүгэ 2 автогрейдер тиийэн үлэлиир. Билигин  суолу кыра массыыналар сырыыларыгар сөп гына  бэлэмниэхтэрэ. Салгыы өрүс суола сабылларыгар, кыстыкка бэлэмнэнии үлэтин:  бөҕөргөтүү, суолу тэҥнээһин үлэтэ былааннанар. Санатан этэр буоллахха, «Бүлүү» федеральнай суолу  хапытаалынай өрөмүөннээһин  иитинэн, быйыл Бүлүү куораттан Чыбыыда үрэх муостатыгар диэри аспаал  суол уурулунна. Эһиилги сылтан Чыбыыда үрэх муостатыттан Үөһээ Бүлүү сэлиэнньэтигэр диэри суол оҥоһуутун күүтэбит, — диэн улуус баһылыга Валерий Николаев телеграмҥа ханаалыгар суруйда.