Хорулалар саҥа хочуолунайы тутууну туруорсаллар

Ньурба улууһугар СӨ Бырабыыталыстыбатын 2024 сыллааҕы отчуота бүгүн Хорулаҕа буолла.

Оробуочай бөлөх салайааччыта, СӨ Бырабыыталыстыбатын бэрэссэдээтэлин солбуйааччы Георгий Степанов сүрүн отчуоту оҥордо.

Георгий Михайлович бэлиэтээбитинэн, дойду үрдүнэн төрүөх ахсаана аччыы турар буоллаҕына, бу көрдөрүү Саха сиригэр туруктаах, нэһилиэнньэ ахсаана элбиир. Төрүүр киһи ахсаана өлүүтээҕэр элбэх. Нэһилиэнньэ олохтоох дьон төрүүрүн суотугар элбиирин тоһоҕолоон эттэ.
Арассыыйа бастыҥ ыалларын күрэҕэр Ньурбаттан Владимировтар дьиэ кэргэн бастыҥ дьиэ кэргэн номинациятын ылбытынан биир дойдулаахтара киэн тутталлар. Ньурба куоракка киин балыыһа иккис уочаратын тутуута саҕаланна, быйыл сыл бүтүүтэ үлэҕэ киллэриллиэхтээх. Киин балыыһаҕа 8 саҥа эмчит кэлэн үлэлии сылдьар. Быйыл өссө терапевт, педиатр, невролог быраастар кэлэллэрэ былааннанар.»Эдэр ыччаты — бырамыысыланнаска» бырагыраама көмөтүнэн Ньурба улууһугар 333 киһи үлэлэммититтэн 225-һэ — 30-гэр диэри саастаах. 2025 сылга федеральнай национальнай бырайыактар салгыы үлэлиэхтэрэ.

Ньурба улууһа сайдарыгар эмиэ көмөлөөх буолуохтаах успуорт улахан тэрээһинигэр (2027 с.) саҥа эбийиэктэр улуус киинигэр эрэ буолбакка, Сүлэҕэ, Чаппандаҕа эмиэ тутуллуохтара. Уопсайынан ыллахха, 2025 сылга өрөспүүбүлүкэҕэ 62 социальнай эбийиэк тутуллуоҕа.

Олохтоохтор, тыа хаһаайыстыбалаах нэһилиэк буолалларынан, бурдук ыларга көмөлөһөргө, оттуур сирдэри сөргүтэргэ, гаас тардыллыбатынан, күүстээх уоту биэрэргэ, успуорт тириэньэрдэрин хамнастарын улаатыннарарга көрдөстүлэр.

Улуус баһылыга Алексей Иннокентьев улуус олохтоохторугар үөрүүлээх сонуну иһитиннэрдэ. Ол курдук, Ил Дархан Айсен Николаев сорудаҕынан, 2027 сылтан улуус 11 нэһилиэгэр гаас ситимин тардыы үлэтин саҕалааһын былааннанна. Ол эрээри, билиҥҥитэ Хорулаҕа күөх уот кэлэр кыаҕа суох.
Хорулалар ону сэргэ икки хочуолунайдаахтарыттан биирэ наар өрөмүөннэ барарынан, саҥа хочуолунайы туруорустулар.

Хорулалар Бырабыыталыстыба отчуотун биһирээтилэр.