Хорсун байыас, бастыҥ үлэһит — Вячеслав Соколов

Бэс ыйын 1 күнүгэр, Мэҥэ Хаҥалас улууһун тыатын хаһаайыстыбатын салалтатын салайааччытын солбуйааччы Александр Борисов уонна салалта исписэлииһэ Нюргуяна Семенова 2-с Наахара нэһилиэгэр Вячеслав Соколов үлэтин-хамнаһын билсэ, ирэ-хоро кэпсэтэ тиийэ сырыттылар.

Ол туһунан Мэҥэ Хаҥалас улууһун дьаһалататын пресс-сулууспата иһитиннэрэр.

Вячеслав Соколов бааһынай хаһаайыстыба салайааччыта. Кини 45  ынах-сүөһүнү, биир үөр эдэр сылгыны иитэр. Василий билигин анал байыаннай дьайыыттан уоппускатыгар кэлэ сылдьар.

2017 сылтан бэйэтэ хаһаайыстыба тэринэн саҕалаан баран, 2018 сыллаахха «саҕалааччы пиэрмэр» граҥҥа кыттан, кыайан хаһаайыстыбатын кэҥэппитэ. Билигин байыаннай дьайыы кыттыылааҕа дойдутугар кылгас уоппускаҕа да кэллэр, таах сыппат, үлэ үөһүгэр сылдьар. Дойдутугар кэлэн номнуо сиик саптаран, 10 га сиригэр 2 туонна эбиэс ыста. Мантан сыллата 20-25 туонна үүнүүнү ылар.

«Байыаннай дьайыыга барыахпар диэри ыһыыбын бүтэриэм, дьоммор оттуур сирдэрин ыйан-кэрдэн биэриэм. Хаһаайыстыбабын оҕолорум, күтүөтүм, аймахтарым көрө-истэ хаалаллар», — диэн дойдубут туһугар, эйэлээх олох иһин туруулаһа сылдьар Вячеслав Владимирович кэпсээтэ.