Хорсун байыас Петр Киприяновка Арассыыйа Дьоруойа үрдүк аат иҥэрилиннэ

Ааспыт 2024 сыл балаҕан ыйыгар дьоруойдуу тыына быстыбыт «Монгол» диэн позывнойдаах Петр Киприяновка Арассыыйа Дьоруойа аат иҥэриллибитин туһунан бүгүн, олунньу 24 күнүгэр, Ил Дархан Айсен Николаев телеграм-ханаалыгар иһитиннэрдэ.

«Өстөөх тирэх пуунугар кимэн киирии кэмигэр бронемашина эстибитин үрдүнэн, бэйэтэ контузияланан уонна улаханнык бааһыран да баран, «Монгол» иннин кимҥэ да биэрбэтэҕэ, байыастарга хорсун-хоодуот буолуу холобурун көрдөрбүтэ. Кини быһаарыныытынан уонна сатабыллаах хамаандалааһынынан байыастар сөптөөх позицияны туппуттара.

Хорсун байыас Петр Киприянов сырдык тыына быстыыта — биһиэхэ улахан сүтүк. Саха сирэ уонна Арассыыйа кини эр санаатын уонна хорсун быһыытын хаһан да умнуохтара суоҕа», — диэн Айсен Николаев суруйар.