Хаартыска Егор Федоров тиксэриитэ
Егор Федоров – байыаннай дьайыыга хантараак баттаһан, «Гошпай» диэн позывнойу ылынан, Аҕа дойдутун көмүскүү сылдьар, үһүс көлүөнэ эписиэрдэр утумнарын сыдьаана буолар. «Гошпай» диэн позывнойдаах байыас эр санааланыыны уонна ураты хорсун быһыыны көрдөрөн «Хорсунун иһин» II истиэпэннээх мэтээлинэн наҕараадаламмыта. Кини сулууспатын, тоҕо байыаннай дьайыыга кыттарын туһунан кэпсээтэ.
– Егор, үгэс буолбут ыйытыы, хантан сылдьаҕын, дьонуҥ-сэргэҥ, эйэлээх олоххо тугу үлэлиириҥ туһунан кэпсээ эрэ?
– Ньурба улууһун Маар нэһилиэгиттэн сылдьабын, оскуоланы онно бүтэрбитим. Дьоллоох оҕо сааһым Маарга ааспыта. 1997 сыллаахха оскуоланы бүтэрэн баран, дьиэбиттэн тэйбитим диэххэ сөп. Ийэлээх аҕам саастарын тухары учууталлаан бараннар, билигин сынньалаҥҥа олороллор. Биһиги бииргэ төрөөбүттэр биэспит. Үлэ-хамнас туһунан кэпсиир буоллахха, манна кэлиэхпэр диэри Дьокуускайга «СЭТО» диэн тэрилтэҕэ, эксплуатационнай-тиэхиньиичэскэй хааччыйыы сулууспатыгар үлэ харыстабылын исписэлииһинэн үлэлээбитим.
– Оттон байыаннай дьайыыга хайдах барбыккыный?
– Былырыын, 2023 сыл муус устар ыйыгар, хантараак түһэрсэммин, Тихоокеанскай флот муора пехотатын 155-с биригээдэтигэр десантнай-штурмовой ротаҕа сулууспаҕа киирбитим. Донецкай Норуодунай Өрөспүүбүлүкэҕэ бэс ыйыгар тиийбиппит, онно Угледар хайысхатынан кыргыһыыга кыттыбытым.
– Арааһы көрдөҕүҥ, биир эмэ өйгөр хатанан хаалбыт түгэн баар дуо?
– Оннук түгэн, мүччүргэннээх сырыылар, олоххор кутталлаах түгэннэр элбэхтэр буоллаҕа. Олортон ойуччу тутан биири кэпсээтэххэ маннык. Бойобуой сорудаҕы толоро киириэхпит биир күн иннинэ биһиги взводпутуттан, 2-с отделениеттан биэс уол дэриэбинэҕэ барбыта. Нэһилиэнньэлээх пууҥҥа киирэр сирбит даача дьиэлэрин быыстарынан этэ. Ол уолаттарбытын дроннар зажигалканы тамнаан өлөртөөн кэбиспиттэрэ. Сарсыныгар биһиги сэттиэ буолан киирбиппит. Дьиэлэр быыстарынан, кыладыапкаларынан, бадыбаалларынан саһа-саһа баран истэхпитинэ, дроннар көтө сылдьан биһигини эмиэ уотунан быраҕаттаабыттара. Бастаан ону тахсан умуруорбуппут. Биһиэхэ ол кэмҥэ дрону тутар сэрии сэбэ баара, үгүстэр туһалаабат диэннэр, көннөрү илдьэ сылдьыбыппыт. Иккистээн кэлэн бырахпыта улаханнык умайбыта, ол иһин, чэ, синэ биир диэн баран, дрону тохтотор тэрили ылаат ойон тахсан туппутум. Тэрилим кырдьык-хордьук тутан ылла. Инньэ гынан, дрон операторын кытары сибээһин сүтэрэн кэбистэ, ол бириэмэҕэ сэттэ буолан, хаайтаран хаалбыт сирбититтэн куотан тахсан быыһаммыппыт. Дрону тутар сэрии сэбэ туһата суох дииллэрэ эрээри, онно сэттэ киһи тыынын быыһаабыта.
– Салгыы тугу гынар былааннааххын?
– Билигин сулууспалыыр чааспар баарбын. Былырыын бааһырыы ылбытым, эппэр биэс оскуолактаах сылдьабын. Саратов куоракка госпитальга сытан эмтэммитим, ол кэннэ икки ый курдук доруобуйабын чөлүгэр түһэриини ааспытым. Дойдубар, дьоммор-сэргэбэр баран, күүс-уох эбинэн кэлбитим. Сотору, этэҥҥэ буоллаҕына, төттөрү инники кирбиигэ барыахтаахпын.
– Баччалаах өлүүнү-сүтүүнү көрбүт, алдьархай аанынан ааспыт киһи эйэлээх олоххо төннөрө ыарахан бөҕө буоллаҕа, ону барытын эн хайдах аһарынаҕын?
– Кырдьык, эйэлээх олоххо төннүү олус уустук буолара, ыарахана саарбаҕа суох. Сыыйа киһи уоскуйар, кэҥиир, онно бириэмэ наада дии саныыбын. «Бириэмэ эмтиир» диэн мээнэҕэ эппэттэр. Дойдубар тиийэн баран дьиэ кэргэммин кытары сылдьан уоскуйбутум, айылҕаҕа, булка-алка сылдьан аһарыныахха сөп дии саныыбын.
– Эн бииргэ төрөөбүт убайыҥ эмиэ байыаннай дьайыыга кыттыбыта. Төрөөбүт дойдуну таптыырга, Аҕа дойдуну көмүскүүргэ, бэриниилээх буоларга төрөппүттэргит ииттэхтэрэ?
– Эһээбит байыаннай эписиэр, Кыһыл Сулус уордьан кавалера, Берлини штурмалааһын кыттыылааҕа, аҕабыт эмиэ байыаннай эписиэр, саппааска тахсыбыт старшай лейтенант, убайым майор званиелаах, мин милиция хапытаана этим. Онон биһиги өбүгэ удьуорун биир ситимнээх эписиэрдэр удьуордара буолабыт диэххэ сөп. Убайбын кытары үһүс көлүөнэ эписиэрдэр буолабыт. Биһиги көлүөнэ дьон патриотическай тыыҥҥа иитиллибиппит. Ийэлээх аҕабыт бэйэлэрин холобурдарынан уонна өбүгэлэрбит үгэстэринэн дойдуга бэриниилээх буолар тыыҥҥа ииттэхтэрэ. Онон төрөппүттэрбит даҕаны, дьиэ кэргэттэрбит даҕаны биһиги байыаннай дьайыыга барарбытын буолуохтааҕын курдук ылыммыттара.
– Егор, кэпсээниҥ иһин махтанабын, этэҥҥэ, кыайыы көтөллөөх эргилин!
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…
Дьокуускайга Эргэ куорат биир дириҥ устуоруйалаах, мааны, сэргэх, сырдык оҥоһуулаах оройуонунан биллэр. Манна киһи күнүстэри,…