Хорсун буойун Ньургун Григорьев кэриэһигэр Сунтаарга буулдьанан ытыы күрэҕэ ыытыллыа

Аҕа дойдуну көмүскээччи сылын чэрчитинэн бу сыл олунньу 11 күнүгэр Сунтаар улууһун Сунтаарыгар А.И.Иванов аатынан олимпийскай эрэллэр успуорт оскуолатын баазатыгар «Бэргэн» буулдьанан ытыыга биирдиилээн бастыыр иһин күрэхтэһии ыытыллыа.

Күрэхтэһии анал байыаннай дьайыыга дьоруойдуу охтубут Сунтаар 3-с №-дээх орто оскуолатын выпускнигын, «Хорсунун иһин», «Ураты хорсун быһыы» мэтээллэр уонна «Эр санаа» уордьанын кавалердара, бэргэн ытааччы, младшай сержант «ГРИГ» диэн позывнойдаах
Ньургун Николаевич Григорьев сырдык аатын үйэтитэр аналлаах.

Буулдьанан ытыы күрэҕэр Бүлүү бөлөх улуустарын 8-11 кылаастарын оҕолорун ортолоругар ыытыллыа. Күрэхтэһиигэ айаапкалары bergen.suntar2025@mail.ru электроннай почтаҕа ыытыаххытын сөп. Сиһилии маннык төлөпүөнүнэн билсиҥ: 89142606108, 89841102540, 89142602020.