Хортуоппуй сэбирдэҕэ хаһыҥҥа хаарыйтарбыт буоллаҕына…

Хоту улуустарынан букатын хас да күн хаардаата. Ол тыына киин улуустарга кытта билиннэ. Сорох сирдэринэн түүнүн -2-3 кыраадыска тиийэ тымныйда. Хаһыҥҥа ордук хортуоппуй хаарыйтарда. Хайдах өрүһүйэбит?  

Чурапчы улууһун С.Д.Федосеев аатынан Хадаар агро хайысхалаах орто оскуолатын исписэлииһэ Мария Лукинаҕа төлөпүөннээн кэккэ сүбэлэри ыллыбыт.

Киэҥ сиргэ олордулларын быһыытынан, хортуоппуйу хаһыҥтан харыстаан бүрүйэр хайдах да кыаллыбат. Онон саамай хаһыҥҥа оҕустарар үүнээйинэн хортуоппуй буолар.

Өскөтүн хортуоппуй сэбирдэҕэ үлүйбүт буоллаҕына бу кэккэ сүбэлэри тутуһар ордук:

• Бастакытынан. Хаһыҥ кэнниттэн хортуоппуйга тута ууну кутумаҥ. Үлүйбүт сэбирдэхтэргэ уу киирэн, түргэнник ууллан, килиэккэлэрин өссө эчэтиэн сөп.
• Иккиһинэн. Үлүйбүт сэбирдэхтэрин туурумаҥ. Бу, үүнээйи үлүйбэккэ хаалбыт сорох чааһын хаххалыан уонна сыыйа чөлүгэр түһүөн сөп.
• Үсүһүнэн. Хортуоппуй буорун тулатын соломонон, мас көөбүлүнэн, туорпанан бүрүйүҥ (мульчирование). Бу сылааһы, сииги тутуоҕа.
• Төрдүһүнэн. Хаһыҥ кэнниттэн биир нэдиэлэ буолан баран үүнээйи чөлүгэр түһэн эрэр сибикитэ билиннэҕинэ, сэбирдэҕинэн фосфордаах-калийдаах  уоҕурдуунан эбии аһатыҥ. 10 лиитирэ ууга 20 кыраамы суурайыллар. Бу үүнээйи чөлүгэр түһэригэр көмөлөһүөҕэ.
• Бэсиһинэн. Үүнээйи хаһыҥҥа төһө улаханнык оҕустарбытын быһаарар туһугар үчүгэйдик сыныйан көрүҥ.
• Алтыһынан. Өскөтүн сэбирдэхтэрэ олус хараарбыт буоллахтарына сэрэнэн тууран ылыҥ.