Хортуоппуйу, оҕуруот аһын уунан уонна бөртөлүөтүнэн тиэрдэллэр

Хоту улуустары хортуоппуйунан, оҕуруот аһын хааччыйыынан Арктикатааҕы эргиэн-логистика хампаанньата дьарыктанар. Бу күннэргэ Абый, Аллайыаха уо.д.а улуустар олохтоохторо сибиэһэй оҕуруот аһын тутан, үөрүүлэрэ муҥура суох. Ол курдук, холобура,  Аллайыаха улууһун олохтоохторо “Мальчиков” хараабылынан айаннаан кэлбит хортуоппуй, хаппыыста, моркуоп, сүбүөкүлэ хаачыстыбата үчүгэйин бэлиэтииллэр. Аллайыахаҕа 56,72 туонна тиэрдиллибит.

— Биһиэхэ, Быйаҥныыр нэһилиэгэр, хортуоппуйу уонна атын оҕуруот аһын бу ааспыт өрөбүлгэ мотуордаах оҥочонон аҕалбыттара. Онон улуус кииниттэн 2,5 т хортуоппуй уонна оҕуруот аһа кэллэ, — диэтэ Быйаҥныыр нэһилиэгин баһылыга Анастасия Большакова.

Бу нэдиэлэ бүтэһигэр сибиэһэй оҕуруот аһа Аллайыаха улууһун Оленегорскайыгар эмиэ мотуордаах оҥочонон барыаҕа. Өссө Абыйтан Аллайыаха саамай кытыы, суола-ииһэ суох нэһилиэгэр – Бөрөлөөххө (Чкалов сэл.) бөртөлүөтүнэн тиийэрэ былааннанар. Былырыын эмиэ маннык тиэрдибиттэрин нэһилиэнньэ биһирээбит. Бу туһунан Арктикатааҕы эргиэн-логистика хампаанньатын генеральнай дириэктэрэ Анна Григорьева “Саха сирэ” хаһыакка иһитиннэрдэ.

Бу курдук, Саха сирин тыатын хаһаайыстыбатын оҕуруотчуттара үгүс сыраларын-сылбаларын ууран туран үүннэрбит хортуоппуйдара, оҕуруоттарын аһа хоту улуустар олохтоохторугар кэмигэр тиийэрин туһугар тустаах хампаанньа үгүс сыратын уурар.

Оттон бу хаартыскаларга Абый улууһугар хайдах илдьэн сүөкээбиттэрин көрөҕүт. Тиэйээччилэр даҕаны, олохтоохтор даҕаны түбүк бөҕөнү көрсүбүттэр. Барытын түргэнник дьаһайыахха, оннун булларыахха, атыылыахха наадатын хааччыйааччылар өйдүүллэр.  Онон көрөргүт курдук, маҕаһыыннарыгар оҕуруот аһа, атын да ас-үөл толору.  Ол аата кыстыкка бэлэмнэр.