Хорулаҕа — «Биир дойдулаах буойуттарга Албан аат аллеята»

Ньурба улууһун  Хорулатыгар Олохтоох көҕүлээһиннэри өйүүр бырагыраама (ППМИ) гранынан  байыаннай дьайыы  кыттыылаахтарыгар аналлаах «Биир дойдулаах буойуттарга Албан аат аллеята» тутуллан үлэҕэ киирдэ.

Бу туһунан улуус баһылыга  Алексей Иннокентьев иһитиннэрдэ. «Хорулалар биир дойдулаахтара, бырайыак ааптара,  байыаннай дьайыыга суох буолбут хорсун буойун Алексей Николаев күн-күбэй ийэтэ Саргылаана Семеновна Николаева көҕүлээһининэн олоххо киллэрдилэр. «Биир дойдулаах буойуттарга Албан аат аллеята» Арассыыйа Сэбилэниилээх күүстэрин кэккэтигэр  байыаннай дьайыыга бойобуой сорудаҕы дьоруойдуу хорсуннук толоро сылдьан сырдык тыыннара быстыбыт уонна бүгүн онно дойду көмүскэлигэр сылдьар эбэтэр сулууспалаан төннүбүт буойуттарга, араас кэмнэргэ буолуталаабыт байыаннай дьайыы кыттыылаахтарыгар ананар. Улуу Кыайыы 80 сылыгар уонна Дойдуну көмүскээччи сылыгар бырайыагы олоххо киллэриигэ нэһилиэк олохтоохторо, тэрилтэлэрэ көхтөөхтүк күүс-көмө буолан үлэлэстилэр. Дьоҥҥо-сэргэҕэ улахан суолталаах искибиэр дьон мустар, бойобуой дьайыыларга кыттыбыт буойуттарбытын кэриэстиир, үйэтитэр уонна оҕону-ыччаты патриоттуу тыыҥҥа иитэр ытык миэстэҕэ кубулуйуо диэн эрэллээхпин. Саргылаана Семеновнаҕа, олохтоох дьаһалтаҕа, нэһилиэк тэрилтэлэригэр, бары олохтоохторго истиҥ-иһирэх махталбын тиэрдэбин.
Биһиги уолаттарбыт геройдуу хорсун быһыыларыгар, төрөөбүт дойдуларыгар муҥура суох бэриниилэригэр сүгүрүйэбит»,- диэн баһылык  кэпсээтэ.