Хоту дойду олохтоохторугар сөптөөх көмө

Бэҕэһээ өрөспүүбүлүкэ Ил Дархана Судаарыстыбаннай Мунньахха (Ил Түмэҥҥэ) Анал этиитин дьон-сэргэ сэргээн иһиттэ. Билигин дьүүллэһии бара турар.

Вера Михайловна Стручкова, Булуҥ улууһун Бороҕон нэһилиэгин баһылыга:

— Мин Ил Дархаммыт Айсен Сергеевич Николаев Арктикаҕа сыһыаннаан этиитин биһириибин. Биһиги, хотулар, уустук айаннаах сиргэ-уокка олоробут. Онон субсидиялаах авиабилиэти былырыыҥҥы оннунан хаалларар туһунан эппитэ саамай сөптөөх. Уонна кэлэр 2025 сыл Ийэ дойдуну көмүскээччи сылынан биллэриллибитэ тоҕоостоох дии саныыбын. Холобура, кэргэним 2022 сылтан байыаннай дьайыы зонатыгар сылдьар.