Хоту дойду ырыа куттаах уолаттара

Соторутааҕыта Куокуйга айар куттаах эстрада ырыаһыта, таптал ырыаларын ымыы гынан көтүппүт Анатолий Горохов саҥа сольнай «Тапталтан кынаттанан» диэн эҕэрдэ кэнсиэрэ буолла.

Бу эрэ киэһэ Анатолий дьон кутун туппут бастыҥ ырыалара, саҥа суруллан тахсыбыт ырыалара ылланнылар, ону тэҥэ кэнсиэргэ талааннаах ырыаһыт Егор Слепцов бастыҥ ырыаларын түһүлгэтэ буолла. Анатолий кэнсиэрин бэйэтэ иилээн-саҕалаан холку, нарын куолаһынан көрөөччүлэри кытта сэгэргэһэр курдук ыытта. Аҥардас мичээрэ көрөөччү сүрэҕин уулларда, буспут моонньоҕон харахтара сүргэни көтөхтө, дьон-сэргэ хас да ырыатыгар тэҥҥэ үҥкүүлэстэ. Ырыатын быыһыгар Усуйаана улууһуттан Хаһааччыйаттан төрүттээҕин, бииргэ төрөөбүттэрин, ийэтин-аҕатын, кэргэнин, оҕолорун видеоклип нөҥүө билиһиннэрдэ. Кыра эрдэҕиттэн ыллыырын сөбүлүүр эбит. Кэлин култуура кэллиэһин режиссура салаатын ситиһиилээхтик бүтэрэн баран, ырыа абылаҥа күүстээх буолан, ыллам ырыа аартыгар үктэммитэ ырааппыт.

Хоту улуустар ырыанан оҕону иитэллэр диэн ханна эрэ истибиттээхпин …

Ол курдук доҕоро, таптаан быраатым диэн ааттыыр Егор Слепцовы, Муоматтан төрүттээх уолу билиһиннэрэн илдьэ сылдьар.

“Мин олох ырыаттан ыраах киһи этим. Устудьуоннуу сылдьан эһиги биир дойдулааххыт мелодист Алексей Калининскай ырыатын куруһуогар дьарыктанан, чочуллан ырыаһыт буолан, махталым муҥура суох. Ырыа эйгэтигэр суолбун-ииспин булан ыллыы-туойа сылдьабын”, — диэн Егор кэпсээтэ. Кини дьоно-сэргэтэ, бииргэ төрөөбүттэрэ үөрэхтээх, аат суол бөҕө, бары айылҕаттан талааннаах дьоннор эбит.

Бу курдук ырыа, үҥкүү дьоро кэрэ киэһэтин бэлэхтээбит, хоту дойду хоһуун уолаттарыгар Анатолий Гороховка, Егор Слепцовка махтал мааныта, баһыыба бастыҥа буоллун Куокуй олохтоохторун аатыттан.

Полина Жергина,

Куокуй, Кэбээйи.