Хоту сир күндү баайа

Бу күннэргэ дойду тэбэр сүрэҕэр, Москва куоракка, «Хоту сир баайа. Арассыыйа маастардара уонна худуоһунньуктара» быыстапка-дьаарбаҥка буола турар. Сибиир, Уһук Илин аҕыйах ахсааннаах норуоттарын култуураларын, үгэстэрин көрдөрөр быыстапка муус устар 29 күнүттэн ыам ыйын 3 күнүгэр диэри ыытыллар.

Быыстапкаҕа Өлөөн, Эбээн Бытантай, Алдан, Орто Халыма, Үөһээ Халыма, Өлүөхүмэ, Сунтаар, Кэбээйи улуустарын маастардарын үлэлэрин холбоон биир улахан – Саха сирэ диэн уопсай истиэндэҕэ туруордулар. Нерюнгри уонна Бүлүү улуустара туспа истиэндэни туруордулар.

Манна Бүлүү улууһуттан элбэх уран тарбахтаах маастардар кытыннылар. Ол курдук норуот маастара Сусанна Семенова (Бүлүү улууһа, Бөтүҥ), уус-уран оҥоһук маастара Светлана Петрова (Бүлүү улууһа, Бөтүҥ), норуот маастара Августина Бурнашева (Бүлүү улууһа, Чинэкэ), норуот маастара Феодосия Григорьева (Бүлүү улууһа, Лөкөчөөн), уус-уран оҥоһук маастара Надежда Яковлева (Бүлүү улууһа, Халбаакы), Бүлүү улууһун маастара Ирина Афанасьева бэйэлэрин үлэлэрин дьон көрүүтүгэр туруордулар. Бу маастардар бары ойуулуур-дьүһүннүүр-прикладной искусствоҕа Арассыыйа худуоһунньуктарын сойууһун чилиэннэрэ.

«Саха Далбар Хотунун таҥаһын тикпит Сусанна Семенова, Светлана Петрова уонна Феодосия Григорьева көстүүмнэрин кэтэн хааман көрдөрүөхтэрэ. Эбии 17 үйэ көстүүмнэрин үтүктэн оҥорбут таҥаспытынан дефилеҕэ хаамыахпыт. Уопсайынан ыллахха, биһиги куонкурус бары көрүҥэр кыттабыт. Мин 19 үйэтээҕи дьабака бэргэһэбин, дэйбиири, сапсыыканы, сэлээппэни аҕалбытым», — диэн санаатын үллэстэр Ирина Афанасьева.