Хоту таһаҕаһы тиэйии пуорума буолла

Бу күннэргэ «Саханефтегазсбыт» АУо исписэлиистэрэ хоту таһаҕаһы тиэйиини тэрийии пуорумугар кытыннылар. Ахсынньы 3-4 күннэригэр ыытыллыбыт Стратегическай сессияҕа Арассыыйа Федерациятыгар таһаҕаһы хоту тиэрдии управлениета кыттыытын туһунан «Саханефтегазсбыт» АУо табаарынай уонна коммерческай управлениетын салайааччыта Елена Бочкарева маннык сырдатта:

— Биһиги иккиэ буолан кыттыыны ыллыбыт. Миэхэ уонна атыы-эргиэн салаатын салайааччытын солбуйааччы Анна Максимоваҕа маннык улахан суолталаах тэрээһиҥҥэ кыттыыбыт олус туһалаах буолла. «Хоту таһаҕаһы тиэрдии туһунан» Федеральнай сокуону олоххо киллэрии 2024 сыл муус устар 1 күнүттэн үлэлиир. Сокуон кииннэммит салайыы систиэмэтин тэрийиигэ болҕомто уурар. Икки күннээх пуорум кэмигэр хоту таһаҕаһы тиэрдии, ону салайыы хаамыытын тэрийии боппуруостарын учуоттаан туран, кэлим уонна элбэх түһүмэхтээх транспортнай логистиканы, тирээн турар кыһалҕалары быһаарарга ылыллыахтаах миэрэлэр тустарынан кэпсэтии буолла. Ону тэҥэ эбии бырабыыталыстыба миэрэлэригэр сыһыаннаах боппуруостары ырытыы барда. Федеральнай сокуону олоххо киллэриини өйүүр инниттэн олоххо-дьаһахха наадалаах таһаҕаһы тиэрдиигэ, ол иһигэр ньиэп бородуукталарын киллэрэн туран, кылгас кэм иһигэр былааннаах үлэни ыытыыга болҕомто уурулларын туһунан дьүүллэстибит.

Маны таһынан, бу үлэни ыытар үөрүйэх эрэгийиэннэр икки ардыларыгар олус туһалаах уопуттарын атастастылар. Пуорум чэрчитинэн үс таһымнаах: федеральнай, эрэгийиэннээҕи уонна олохтоох салайыы тиһигэ олоххо киириэҕэ.