Хоту улуустарга таһаҕаһы тиэрдиигэ муҥутуур миэрэлэр ылыллыахтара

Айсен Николаев дойду бэрэсидьиэнэ Владимир Путин бэрэссэдээтэллээх РФ бырабыыталыстыбатын сүбэ мунньаҕар хоту улуустарга таһаҕаһы тиэрдии хайдах бара турарын кэпсээтэ.

“Сыллааҕы былааммыт – 1,4 мөл. туонна, бу дойду тиэйэр таһаҕаһын 40-ча %-нын ылар. Сыл саҕаланыаҕыттан 753 тыһыынча туоннаны тиэртибит. Сайыҥҥы уу суола үлэлии турар, былааннаммыт 635 тыһ. туоннаттан 157 тыһыынчата тиэйилиннэ. Уопсайа 39 млрд солкуобай наада буоларыттан  бүгүҥҥү күҥҥэ 29,2 млрд үбүлэннэ”, — диэн Ил Дархан Владимир Путиҥҥа балаһыанньаны билиһиннэрдэ.

Ил Дархан судаарыстыбаннай уонна муниципальнай наадаларга таһаҕаһы тиэйиини хааччыйар тэрилтэлэргэ кирэдьиит бырыһыанын сорҕотун субсидиялыырга этии киллэрдэ. Бу тарыыбы тутарга уонна таһаҕаһы кэмигэр тиэрдэргэ көмөлөһүөҕэ.

Бэрэсидьиэн РФ бырабыыталыстыбатыгар эрэгийиэннэри кытта бииргэ хоту таһаҕаһы тиэрдиигэ муҥутуур миэрэлэри ылалларын сорудахтаата.