Хотугу дьиэ табатын иитиитин туһунан сокуоҥҥа уларытыылар

Ил Түмэн XV (уочараттаах) пленарнай мунньаҕын чэрчитинэн, парламентарийдар норуот дьокутаата Е.Х. Голомарева көҕүлээһининэн хотугу дьиэ табатын иитиитин туһунан сокуонугар уларытыылары киллэрии туһунан 254-7 №-дээх  сокуонун бырайыагын бастакы ааҕыыга ылыннылар.

Сокуон бырайыагынан маннык уларытыылар киллэриллэллэр:

6-с ыстатыйа саҥа эрэдээксийэнэн: «Хотугу дьиэ табатын иитиитин бородууксуйатын оҥорон таһаарыы, харыстааһын уонна батаран оҥоруу зоотехническай уонна ветеринарнай-санитарнай ирдэбиллэри (стандартары, нуормалары уонна быраабылалары) тутуһан оҥоһуллуохтаах».

7-с ыстатыйаҕа «дотация» диэн тыл «субсидия» диэн тылынан солбуллар, тоҕо диэтэххэ Бүддьүөт кодексатын 6-с ыстатыйатыгар сөп түбэһиннэрэн,  бүддьүөттэр икки ардыларынааҕы трансфертар буолаллар, босхо олохтоноллор уонна ханна туттуллаллара ыйыллыбат. Оттон бу сокуоҥҥа көрүллүбүт үп-харчы ханна туттуллуохтааҕа чопчу ыйыллар.

10-с ыстатыйаны хотугу дьиэ табатын иитиитинэн  үлэлээһин диэни СӨ Борокуратууратын 2024 сыл ыам ыйын 17 күнүнээҕи суругар олоҕуран соторго этиллэр. Ол сурукка этиллэринэн, хотугу дьиэ табатын иитиитинэн дьарыктанар быраап киһи омугуттан тутулуга суох буолар.

17-с ыстатыйа «Бэтэринээрийэ туһунан» федеральнай сокуон 19.1 ыстатыйатыгар сөп түбэһиннэрилиннэ.

Итини таһынан, 24-с ыстатыйа «Булт уонна булт ресурсаларын харыстааһынын туһунан уонна РФ сорох сокуон аакталарыгар уларытыылары киллэрии туһунан» 2009 сыл от ыйын 24 күнүнээҕи 209-ФЗ №-дээх федеральнай сокуоҥҥа сөп түбэһиннэрилиннэ.

Балыктааһын чааһыгар 28-с ыстатыйа «Балыктааһын уонна биологическай ресурсалары харыстааһын туһунан» 2004 сыл ахсынньы 20 күнүнээҕи 166-ФЗ №-дээх федеральнай сокуоҥҥа сөп түбэһиннэрилиннэ:

28-с ыстатыйаттан «РФ гражданнар доруобуйаларын харыстабылын туһунан сокуоннарын олоҕунан уонна атын сокуоннарынан» диэн тыллар сотулуннулар.

Ил Түмэн пресс-сулууспата