Хотугу пуорумҥа 500-тэн тахса эспиэр кыттыыны ылыаҕа

Дьокуускайга балаҕан ыйын 24-27 күннэригэр  норуоттар икки ардыларынааҕы V Хотугу пуорум ыытыллыаҕа.

Далааһыннаах тэрээһиҥҥэ Арассыыйа уонна аан дойду учуонайдара, экология уонна килиимэт уобаластарыгар эспиэрдэр, судаарыстыбаннай диэйэтэллэр, ону тэҥэ биисинэс уонна уопсастыбаннай тэрилтэлэр бэрэстэбиитэллэрэ кыттыыны ылыахтара. Кытайтан, Индияттан, Монголияттан, Узбекистантан, Малиттан, уо.д.а. дойдулартан бэрэстэбиитэллэр түмсүөхтэрэ.

Пуорумҥа 60-ча  экспертнэй былаһаакка үлэлиэҕэ. Эспиэрдэр энергетиканы сайыннарыы, ол иһигэр ядернай, норуоттар икки ардыларынааҕы сыһыан, Арктика уонна Хотугу дойду усулуобуйатыгар олох хаачыстыбатын тупсарыы боппуруостарын дьүүллэһиэхтэрэ.

«Пуорумҥа уон дойдуттан 500 эспиэр кыттыыны ылыа. Хотугу пуорум Арктика эрэгийиэннэрин уонна куораттарын олохторун- дьаһахтарын, Хотугу сир бигэ туруктаах сайдыытыгар бииргэ үлэлээһин, Арктика култууратын уонна креативнай индустрия, килиимэт уларыйыытын уонна ирбэт тоҥ ириитин боппуруостарыгар ананна. Биһиги пуорум генеральнай партнеругар, Мельниченко пуондатыгар махтанабыт«, — диэн этэр Хотугу пуорум толорооччу дириэктэрэ Владимир Васильев.

Тэрээһин кэмигэр тиэмэлэринэн аҕыс сиэксийэ үлэлиир: «Жизнестойкость Арктики: регионы, города и сообщества», «Климатические вызовы современности», «Человек в Арктике»,  «Креативные индустрии и культура Арктики в глобальном контексте», «Глобальное партнёрство для устойчивого развития Севера и Арктики», «Жизнеобеспечение и безопасность»,  «Северный Форум: голос регионов в международной повестке», «Молодёжный Северный Форум».

Пуоруму тэрийээччилэринэн «Хотугу Пуорум» норуоттар икки ардыларынааҕы хотугу эрэгийиэннэр тэрилтэлэрэ, СӨ Бырабыыталыстыбата, М.К.Аммосов аатынан ХИФУ, Андрей Мельниченко үтүөнү оҥорор пуондата буолаллар.

СӨ Ил Дарханын уонна Бырабыыталыстыбатын пресс-сулууспата