Хотугу таһаҕаһы тиэрдии былаана 81% туолла

Бүгүҥҥү күҥҥэ хотугу таһаҕаһы тиэрдии былаана 81% туолан турар. Ол эбэтэр, саамай ыраах, суола-ииһэ суох улуустарга уунан, сиринэн уонна тимир суол тырааныспарынан барыта 1 мөлүйүөн 115 тыһыынча туонна таһаҕас тиэрдилиннэ.

Хотугу таһаҕаһы тиэрдии биирдэ эрэ тиэрдиллэр аахсыйа буолбатах, логистика өттүнэн сүрдээх уустук систиэмэ буолар.

— Билигин уунан таһаҕаһы тиэрдии түһүмэҕэ ситиһиилээхтик түмүктэннэ. Үлэ тохтообот. Кэлэр түһүмэххэ — кыһыҥҥы суолунан таһаҕаһы таһыыга бэлэмнэнии номнуо бара турар. Маны тэҥэ, тимир суолунан уонна массыынанан таһаҕас өрөспүүбүлүкэҕэ кэлэ турар.

Бу улахан  сыыппара нөҥүө бырабыыталыстыба, тустаах тэрилтэлэр биир ситимнээх үлэлэрэ турар. Бу улахан үлэ —  төһө да тыйыс усулуобуйалаах буоллар, хас биирдии киһи олорор усулуобуйата тупсарын туһугар оҥоһуллар. Үлэ салҕанар! — диэн гражданскай оборуонаҕа, нэһилиэнньэ олоҕор куттал суох буолуутун хааччыйыы миниистирин э.т. Айаал Вензель тоһоҕолоон бэлиэтээтэ.