Хотугу тыын — сахалыы ойуулукка

Кэлин Сахабыт сиригэр оҕоҕо аналлаах сахалыы ойуулуктары элбэхтик көрөр буоллубут. Төрөөбүт тылы туруулаһааччылар сахалыы ойуулуктар оҕоҕо сабыдыаллара күүстээҕин үгүстүк бэлиэтииллэр. Ол курдук, олунньу 13 күнүгэр, саха оҕотун, ыччатын үрдүк үөрүүтүгэр «Үлэ кыбаартала» креативнай кластерга «Туундара» анимационнай устуудьуйа «Муҥха» ойуулугу сүрэхтээтэ.

Ойуулук сүрэхтэниитэ оҕо аймах сылаас эйгэлээх түһүлгэтин үөскэттэ. Анимационнай хартыыҥка таһыма олус үрдүгүн көрөөччүлэр бэлиэтээтилэр. Режиссер Дмитрий Кольцов санаатын кытта үллэһиннэ: «Саха кыһына 3Д-анимацияҕа бэркэ ойууламмыт, көрөөччүгэ тиэрдиллибит. Бу олус эриэккэс көстүү». Саундтрек ааптарынан “Собо” сахалыы бөлөх буолар.

СӨ Бырабыыталыстыбатын бэрэссэдээтэлин солбуйааччы Анатолий Семенов эҕэрдэлээн баран, аны үһүс “Таҥха” ойуулук тахсарын күүтэбит диэн эттэ. Ону таһынан, Ил Дархан биллэрбитинэн, Оҕо саас сылын чэрчитинэн элбэх туһалаах контеннаах оҕо ханаалын таһаарыахтаахпыт диэн бэлиэтээтэ.

Устуудьуйа маркетиҥҥэ дириэктэрэ Анна Борисова ойуулук оҥоһуллан тахсарыгар өҥөлөөх дьоҥҥо, көрөөччүлэргэ махтанна. «СӨ Сайдыытын корпорациятын» генеральнай дириэктэрэ Афанасий Саввин ойуулук улахан суолталааҕын уонна аан дойду таһымнааҕын туһунан эттэ.

“Туундара” киэҥ көҕүүстээх үлэтэ

Күн бүгүн Саха сиригэр сахалыы саҥарар, ыллыыр-туойар ойуулуктар баар буоллулар. Оҕолор ойуулуктары көрөн, төрөөбүт төрүт тылларын сүмэтин сүрэхтэригэр-быардарыгар иитиэхтииллэрэ саарбаҕа суох.

“Туундара” устуудьуйа үлэтин — хамнаһын былырыыҥҥы сайынтан саҕалаабыт. Салайааччы, устуудьуйаны төрүттээччи, режиссер Александр Моруо оҕолорго интэриэһи тардар ойуулук оҥоруохха диэн идиэйэни эппит эбит. Көннөрү буолбакка, кинилэргэ доҕор буолар дьоруойдардаах уонна оҕолорго чугас, бэркэ билэр эйгэлэрин сырдатар ойуулук оҥоруохха диэбит. Бу кэнниттэн «Тымныы Оҕуhа» сценарий төрөөн – үөскээн тахсыбыт. Оттон кэлин интэриэстээх дьон элбээн, “Туундара» устуудьуйа аһыллыбыт.

Устуудьуйа төрүттэммитин кытта тута «Һөҕүҥ» арт – биидьийэни таһаарбыттар. Оттон муус устарга – «Тымныы оҕуһа” диэн кылгас миэтэрэлээх 3D — ойуулук тахсыбыт.

«Үлэ кыбаартала» креативнай кластер резиденэ «Тундра» анимация устуудьуйата 2023 сыл муус устарыгар «Startup Village» диэн Сколково пуонда стартаптар ортолоругар ыыппыт куонкуруһугар иккис миэстэ буолбута.

«Тымныы Оҕуһа» ойуулугу Торонтоҕа норуоттар икки ардыларынааҕы ImagineNATIVE киинэ бэстибээлигэр алтынньы 17-22 күннэригэр көрдөрбүттэрэ. Бэстибээл сыанатыгар ойуулугу устуудьуйа дириэктэрэ  Александр Моруо билиһиннэрбитэ. Саха мультига киэҥ эйгэҕэ тахсыыта, аан дойду үрдүнэн 70 финалист иһигэр киириитэ улахан ситиһии. ImagineNATIVE Film +Media Arts Festival  аан дойду үрдүнэн биир бөдөҥ киинэ уонна олохтоох норуоттар медиа-ускуустубаларын көрдөрөр бэстибээл буолар. Аан дойду араас норуоттарын киинэлэригэр, видео, араадьыйа, ону сэргэ саҥа медиа үлэлэригэр анаммыт бэстибээл буолар.

Хотугу куйаар устун

Муҥха диэн тугуй? Бу саха омук мындыр өйүнэн айан таһаарбыт, Сибиир атын ханнык атын омугар суох, мууһу аннынан балыктааһын биир ньымата буолар. Устар уһун үйэлэр усталарыгар чочуллубут дириҥ үгэс.

Саҥа ойуулук Ньукку диэн кыыс устуоруйатын, ону таһынан, муҥха үгэнигэр мүччүргэннээх сырыыларын көрдөрөр. Кыһыҥҥы кэллиэксийэҕэ бу иккис ойуулук. Кэнники барытын биир куйаарга (вселенная) ситимниэхпит, холбуохпут диэн этэллэр оҥорон таһаарааччылар. Устуудьуйа хамаандата «Үлэ кыбаартала” креативнай кластер резиденэ буолар. Бу кластер — элбэх дьоҕурдаах, ураты көрүүлээх, араас барайыактар тула үлэлиир дьон мустубут сирэ.

Cахалыы ойуулук суолтата

Устуудьуйа үлэтин сүрүн сыалынан анимацияҕа Хотугу сир култууратын баайын, эгэлгэтин билиһиннэрии уонна Саха сиригэр анимация индустриятын сайыннарыы буолар диэн бэлиэтиир.

Саха киһитэ тылын туруулаһар сыала дьэҥкэ буоларын туһугар билигин араас хамсааһыннар үөскээн эрэллэрэ, энтузиастар көхтөөхтүк үлэлииллэрэ сүрэҕи үөрдэр, сүргэни көтөҕөр. Төрөөбүт тылга, сурукка – бичиккэ ойуулук кылаатын киллэрсэрэ чуолкай. Тылбыт туһугар – иннибит диэки!

Эльдар САДОВНИКОВ.

Хаартыскалар: «Үлэ кыбаартала» креативнай кластертан