Хотугу улуустарга “Мобильнай быраас” бырайыак туһалааҕын көрдөрдө

Быйыл саас олунньуга Ил Дархан Айсен Николаев дьаһалынан “Мобильнай быраас” диэн бырайыак тэриллэн, билигин хотугу улуустарга барыта уон биэс тыһыынчаттан тахса киһи доруобуйатын көрдөрүннэ. Манна ордук суолталааҕа баар, быраастар суола-ииһэ суох ыраах сытар нэһилиэнньэлээх пууннары барыларын хабан үлэлииллэр.

Айсен Сергеевич Арктика, хотугу улуустар боппуруостара ханнык баҕарар эйгэҕэ туспа көрүллүөхтээхтэр диэн өссө 2018 сыллаахха этэн турар. Ол чэрчитинэн федерация таһымыгар биһиги Бастакы бэрэсидьиэммит Михаил Николаев саҕаттан туруорсуллубут боппуруоһу – Саха сирин хотугу улуустарын барыларын Арассыыйа Арктикатын зонатыгар киллэриини – тиһэҕэр тиэрдэн, билигин 13 улуус бары бу испииһэккэ киирэн, Арктика сайдыытын бырагырааматынан толору туһанар кыахтаннылар. Итини таһынан 2019 сыллаахха Арктика сайдыытыгар туспа министиэристибэ тэрийэн бу улуустар кыһалҕаларын быһаарыыны барытын биир сиргэ түмпүтэ. Ити түмүгэр өрөспүүбүлүкэ бүддьүөтүн таҥыыга бу улуустар хас биирдии эйгэҕэ туспа пуунунан киирэр кыахтаммыттара. Онон Арктика, хотугу улуустарыгар тутуу да, араас бырайыак да атын улуустартан итэҕэһэ суох тэҥҥэ барар буолбута.

Доруобуйа харыстабылыгар быйыл олунньуттан “Мобильнай быраас” диэн бырайыак үлэлиир. Хотугу улуустар киин сиртэн ыраах буоланнар, үксүгэр бырааска, аналлаах исписэлиискэ кэмигэр көрдөрбөккө хаалаллара баар суол. Ону ааһан улахан хамсык кэнниттэн дьон-сэргэ уопсай туругун көрдөрүнэрэ эмиэ наада этэ. Ол иһин Айсен Сергеевич быйылгыттан бу бырайыагы саҕалыырга сорудахтаабыта. Өскөтүн хотугу улуустарга барыларыгар билигин 70 тыһыынчаттан тахса киһи олорор буоллаҕына, бу бырайыагынан номнуо 15 тыһыынчаттан тахса киһи быраастарга көрдөрүнэн, доруобуйатын бөҕөргөттө. Быраастар биригээдэлэригэр терапевт, кардиолог, педиатр, оҕолору көрөр тиис бырааһа, гинеколог, отоларинголог, нарколог, эндокринолог, невролог, ультразвуковой диагностика бырааһа, пульманолог, офтальмолог курдук олус наадалаах исписэлиистэр киирэн үлэлииллэр.

— Хотугу улуустарга сүрүннээн сүрэх, тымыр, ону таһынан эндокриннай систиэмэ, сүһүөх ыарыылара үгүстэр. Биригээдэлэрбит үлэлэрин түмүгэр ыарыһахтары оройуон балыыһатыгар эбэтэр өрөспүүбүлүкэ балыыһаларыгар учуокка туруораллар. Онон бу үлэ биир тиһиктээхтик барар, — диэн мобильнай биригээдэр салайааччыта Артем Ксенофонтов иһитиннэрэр.

Саха сирэ киэҥ сирдээҕинэн-уоттааҕынан уонна суола-ииһэ суох үгүс нэһилиэнньэлээх пууннардааҕынан бу уопут дьоҥҥо-сэргэҕэ туһалааҕа номнуо көһүннэ. “Депутатскай интэринээт дьиэтигэр мин 2010 сылтан үлэлиибин. Үлэлиирим тухары бу маннык биригээдэнэн быраастар кэлэн үлэлээбиттэрин, миэстэтигэр олохтоохтор бары көрдөрүммүппүтүн, толору мэдиссиинэ өҥөтүнэн туһаммыппыттын өйдөөбөппүн. Биригээдэбит быраастарыгар уонна Ил Дархаммытыгар Айсен Сергеевичка улахан махталбытын тиэрдэбит”, — диэн Усуйаанаттан аҕа саастаах уонна доруобуйаларынан хааччахтаах дьон интэринээт-дьиэлэрин салайааччыта Дмитрий Тихонов махталын тиэрдэр.

Бу саҕалааһын Арассыыйаҕа үчүгэй уопут быһыытынан сыаналанар. Билигин бу бырайыагы кэҥэтэн Арктика, хотугу улуустары таһынан киин сиртэн ыраах суола-ииһэ суох нэһилиэнньэлээх пууннарга барыларыгар киллэрэр былааннаахтар.