Хотугу улуустарга көтөргө субсидия көрүллүөҕэ

Быһа эпиир кэмигэр Айсен Николаев хотугу улуустарга субсидиялаах авиабилиэттэр бүтэн, бу сыл бүтүөр диэри атыыламматтарын туһунан өрөспүүбүлүкэ олохтоохторун ыйытыыларыгар хоруйдаата.

Кини этэринэн, бастакы бүддьүөккэ көрүллүбүт үп түргэнник бүппүтүттэн кыһалҕа үөскээбит. «Кыһалҕа баар. Ол бастакы бүддьүөккэ түргэнник бүппүт үп-харчы көрүллүбүтүттэн тахсар. Хомойуох иһин, бырабыыталыстыба кэмигэр быһаарыныыны ылымматаҕа. Онтон бүгүн көрөбүт, улуус иһинээҕи тиэйиигэ, Дьокуускайтан улуус кииннэригэр тиэйиигэ субсидиялаах рейстэргэ харчы хаалбатах», — диэн бэлиэтээтэ Айсен Николаев.

Итини тэҥэ, Ил Дархан бу маршрут социальнай суолталаах буоларын тоһоҕолоото:

«Бу олус суолталаах  маршрут. Ол эрээри, биллэн турар, маны судаарыстыбаннай эбэһээтэлистибэ диэн ааттыыр эмиэ сатаммат. Ол гынан баран, биһиги усулуобуйабытыгар дьон хоту диэки салгынтан атын суолунан тиийэр кыахтара суоҕун өйдүүбүт. Онон биһиги кинилэри өйүөхтээхпит. Ол иһин мин эмиэ соторутааҕыта премьер-миниистиргэ бу рейстэрбитин хааччыйар туһугар үп-харчы булан көрөрүгэр сорудахтаабытым».

Айсен Николаев «Полярнай авиахампаанньа» үлэтин кыһалҕаларын чопчу быһаарда. Хампаанньа үлэтин түмүгүнэн эмиэ астымматын бэлиэтээтэ.

Айсен Николаев эбэн эттэ, кэлэр сыллааҕы бүддьүөккэ салгынынан айан субсидиятыгар өссө сөптөөх кээмэйдээх үп көрүллүөҕэ. «Кэлэр сыллааҕы бүддьүөккэ, биллэн турар, бу үп хара маҥнайгыттан сөптөөхтүк көрүллүбүтүн хааччыйыахпыт диэн эрэллээхпин», — диэн бэлиэтээтэ.

Сиһилии: https://www.sakha.gov.ru/news/12636