Хотууна – өрөспүүбүлүкэтээҕи үгүс куонкурустар Кылаан кыайыылаахтара

Саха Өрөспүүбүлүкэтин Суруйааччыларын сойууһун чилиэнэ, «Чурапчы» литературнай түмсүүтүн салайааччыта, Дьааҥытааҕы «Эчий» литературнай түмсүү чилиэнэ, Саха Өрөспүүбүлүкэтин култууратын туйгуна Римма Иннокентьевна Корякина-Хотууна 65 сааһын өттүк харалаах, илии тутуурдаах —  үс саҥа кинигэлээх көрүстэ.

Олус истиҥник саныыр уонна ытыктыыр  киһитэ, СӨ норуодунай суруйааччыта Иван Мигалкин бэргэн этиилэрин сыа-сым курдук тутан киллэрэн, оҕолорго анаан суруйбут «Минньигэс түүл остуоруйалара», улахан дьоҥҥо «Үргүүк былыт быыһынан» хоһооннорун хомуурунньуга уонна уһуйаан, алын кылаас оҕолоругар  «Саҥа хаарга ким хаамта?» диэн хоһооннорун кинигэтэ «Айар», «Дани Алмас» кинигэ кыһаларыгар бэчээттэнэн таҕыстылар.
Хотууна «Айар үлэ аргыстаах аартыгар» диэн ааттаммыт дьоро тэрээһинэ тохсунньу 31 күнүгэр Чурапчы сэлиэнньэтигэр Егор Борисов аатынан архыып-бибилэтиэкэҕэ истиҥ-иһирэх эйгэҕэ буолла.

Ааптардарын, биир сойуустаахтарын эҕэрдэлии «Айар» кыһа генеральнай дириэктэрэ Август Егоров, дириэктэри солбуйааччы Валерий Луковцев, Саха Өрөспүүбүлүкэтин суруйааччыларын сойууһун бэрэссэдээтэлин э.т. Владислав Доллонов, сойуус чилиэннэрэ кэлбиттэр. Римма Корякинаны култуура улуустааҕы салаатын салайааччы Петр Гуляев, Хотууна учуутала Елена Капитонова, өрөспүүбүлүкэҕэ биллэр суруналыыс Иван Пономарев, «Чурапчы» литература түмсүүтүн чилиэннэрэ, бииргэ үөрэммит, алтыспыт доҕотторо, чугас аймахтара уо.д.а. эҕэрдэлээтилэр. Кинилэр Римма Иннокентьевна ураты суоллаах-иистээх суруйааччы, тапталлаах кэргэн уонна 6 оҕо, сиэннэр күн күбэй ийэлэрэ, эбээлэрэ буоларын, дьиҥнээх сахалар үөскээбит Дьааҥы улууһуттан төрүттээх буолан, саха тылын сүмэтин илдьэ кэлбитин, хотулуу хоһуунун, булчутун, айанньытын уо.д.а. үтүө хаачыстыбаларын иһирэх тылынан толору арыйдылар. Сүрүнэ — айар үлэтигэр  ылыммыт аатын кэрэһилээн, олох устун хотуулаахтык айанныыр.
Тэрээһини бибилэтиэкэ сүрүн исписэлииһэ Вера Платонова иилээн-саҕалаан ыытта, ааптар айар үлэтин, олоҕун туһунан сиһилии сырдатта. Култуура улуустааҕы салаатын уолаттара, «Чурапчы» айар түмсүү чилиэннэрэ Хотууна хоһооннорунан литературнай композицияны туруордулар. С. А. Новгородов аатынан Чурапчы орто оскуолатын үөрэнээччилэрэ хатайдаан (валяние) оҥорбут куукулаларынан суруйааччы остуоруйатыттан көрдөрдүлэр.
Улуус баһылыгын социальнай боппуруостарга солбуйааччы Мария Кронникова:
—Римма Корякина-Хотууна саха киһитэ долгуйар боппуруостарыгар дириҥник толкуйдатар айымньылардаах. Ордук үөрүүлээҕэ диэн -– кини оҕолорго аналлаах айымньыларга ылсыста. Урут оҕо литературатугар киһи астынар айымньылара суохтарын кэриэтэ этилэр, билигин даҕаны ити көстүү баар. Ол иһин, оҕоҕо суруйар киһини ааҕааччы үөрэ, сэргии көрсөр. Римма Иннокентьевна бүгүн ити биир айымньытын оҕолор хайдах курдук үчүгэйдик оонньообуттарын бэйэҕит көрдүгүт. Айар киһи элбэх, оттон  биһиги Хотуунабыт өрөспүүбүлүкэ үгүс куонкуруһугар Кылаан кыайыылаах буолуута кини саха литературатыгар бастыҥнар ахсааннарыгар кимиилээхтик киирбитин көрдөрөр дии саныыбыт.
Римма Иннокентьевна салайар литературнай түмсүүтэ Чурапчыттан 20-чэ, онтон атын сиргэ олорор чилиэннэрин аахтахха, 40-чалар. Биһиги онтон олус үөрэбит», -– диэн бэлиэтээн эттэ.

«Айар» кыһа генеральнай дириэктэрэ Август Егоров:
—Римма Корякина биһиэхэ бэчээттэппит бастакы кинигэтэ  олус түргэнник атыыланан бүтэн хаалбыта. Дьон сэҥээрэр ааптара эбит диэммит,  былырыын биир остуоруйатын ахсаанын уруккутааҕар элбэтэн, 3 тыһыынчанан таһаарбыппыт. Бу кинигэ хайыы үйэ аҥаара атыыламмытынан,  эмиэ дьон-сэргэ сэҥээрдэ диэн сыаналыыбыт.
Хотууна оҕо литературатын курдук уустук дьыалаҕа ылсан, дьоҥҥо-сэргэҕэ биһирэнэн, саха литературатыгар оҕо суруйааччыта диэн ааты ылла. Кырдьык, оҕоҕо суруйар судургута суох, билиҥҥи литературабытыгар оҕо суруйааччылара тарбахха баттаналлар. Кинилэртэн биирдэстэринэн Римма Корякина буолла диэххэ сөп. Онон ити улахан саҕалааһыҥҥынан эҕэрдэлиибин. Саха литературатыгар сэмэйдик киирэн баран, күүскэ хардыылаан айаннаан иһэҕин. Ону сэргэ кыыһыҥ Сардаана Корякиналыын ханнык эмэ айымньыны кыттыһан суруйаргыт буоллар, саха литературатыгар сэдэхтик бэлиэтэнэр көстүүгэ ураты суолланыа этигит», -– диэн баҕа санаатын тириэртэ.

Владислав Доллонов Хотууна олох, дьылҕа, төрөөбүт дойду, дьиэ кэргэн, о.д.а. киэҥ тиэмэлэргэ суруйбут дириҥ өйдөбүллээх хомоҕой тыллаах хоһоонноро ааҕааччы улахан биһирэбилин ылалларын, сойуус биир көхтөөх чилиэнэ буоларын, игирэ кыргыттара ийэлэрин тылларыгар толорбут «Мин эһэм» диэн ырыаттан олус долгуйбутун бэлиэтээтэ.
«Офсет» кинигэ кыһатын үлэһитэ, сойуус чилиэнэ Галина Басылайканова-Кэнтик Кыыһа ааптардарыгар Римма Корякинаҕа кинигэ таһаарарыгар 10 тыһыынча суумалаах сэртипикээти бэлэх туттарда.

Бүгүҥҥү дьоро киэһэ кыттыылаахтарын биир сэргэхсиппит, сөхтөрбүт да түгэнинэн Римма Иннокентьевна уонна Александр Егорович Корякиннар алта оҕолоро бары тахсан талааннарын арыйбыттара буолла. Бары ийэлэрин тылларыгар бииргэ уонна иккилии буолан ырыалары толордулар. Дьааҥы улууһун култуураҕа управлениетын салайааччытынан үлэлиир уоллара Иннокентий Юмшанов  хас да ырыаны толордо, үлэтин-хамнаһын сырдатта. Кинилэри көрө-истэ олорон төрөппүккэ таптал, үрдүк махтал диэн маннык буоллаҕа диэн үөрэ, долгуйа ылынныбыт.

Ааптар «Уран тыл биһигэр бигэнэн» диэн кинигэтин быыстапкатын уонна улахан экраҥҥа көстө турбут видеолары көрөн, талан ылбыт идэтинэн доруобуйа харыстыбылыгар бэриниилээхтик үлэлээбитин, оҕолорун, сиэннэрин улаатыннартаан, билигин айар үлэ алгыстаах аартыгар бигэтик киирбитин үөрэ ылынныбыт. Оттон тэрийээччилэр: «Бүгүҥҥү дьоро киэһэҕэ курдук,  маннык элбэх суруйааччы биир түһүлгэҕэ түмсүбүтүн өссө көрө иликпит. Биһиги киэн туттар тапталлаах кыыспытын ытыктаан, үрдүктүк сыаналаан, ыҥырыыбытын ылынан кэлбиккитигэр олус үөрдүбүт», — диэн махталларын тириэртилэр.
Кырдьыга да, бүгүн Римма Корякина-Хотуунаны «За заслуги перед районом III степени» улуус бочуоттаах бэлиэтинэн, «Чурапчы улууһун култууратын уонна ускуустубатын сайдыытыгар кылаатын иһин» түөскэ кэтиллэр бэлиэнэн, Дьааҥы улууһун дьаһалтатын Бочуотунай грамотатынан (баһылык Владислав Иванов) наҕараадалааһын -– иккис дойду оҥостон олорор Чурапчытын уонна төрөөбүт Дьааҥытын улуустарын дьонун-сэргэтин улахан билиниитэ, ытыктабыла.

Римма Корякина-Хотууна 11 кинигэлээх, хоһоонноро 22 хоһоон хомуурунньугар киирбиттэрэ, 18 хоһоон хомуурунньугун таһаарарга үлэлээтэ.