Художественнай гимнастика күрэхтэһиитигэр бөлөҕүнэн толорууга Беларусь гимнасткалара — инники күөҥҥэ

Художественнай гимнастика күрэхтэһиитигэр бөлөҕүнэн толорууга Беларусь гимнасткалара — инники күөҥҥэ

«Азия оҕолоро» норуоттар икки ардыларынааҕы VIII оонньууларын художественнай гимнастикаҕа күрэхтэһиилэрэ бүгүн иккис күнүн «Дохсун» спорткомплекска буола турар. Куоталаһыы бастакы түһүмэҕэр бөлөҕүнэн 8 дойду гимнасткалара кыттыбыттара, бүгүн — 10 хамаанда. Саха сириттэн икки сүүмэрдэммит хамаанда кытта сылдьар. Ол эбэтэр 14 гимнастка төрөөбүт дойдутун чиэһин көмүскүүр.
2009-2011 сыллааҕы төрүөх кыттааччыларга  бөлөҕүнэн толорууга бэҕэһээ Беларусь Өрөспүүбүлүкэтэ бастаабыта. Көрдөрүүтэ — 31.050 этэ. Бүгүн 31,05 көрдөрүүлэнэн, эмиэ бастакы үрдэлгэ таҕыста. Онтон Сибиир Федеральнай хамаандата тилэх баттаһан иһэр. Бэҕэһээ эмиэ иккис этэ. Саха сирин бастакы хамаандата — 29.45 көрдөрүүлэнэн, бүгүн эмиэ үһүс миэстэ буолла.
Бөлөҕүнэн толорууга художественнай гимнастикаҕа олус күүстээх хамаандалар кэлбиттэрин бэлиэтиир тоҕоостоох. Ол курдук, Ураллааҕы Федеральнай, Казахстан, Узбекистан хамаандалара ситиһиилээхтик кытта сылдьаллар. Саха сирин иккис хамаандатын көрдөрүүтэ — 25.700. Бүгүн эмиэ итинник көрдөрүүлэннэ. Кыргыз Өрөспүүбүлүкэтин хамаандата 22,6 очукуонан күрэхтэһиини түмүктээтэ.
Эбиэттэн киэһэ гимнасткалар биирдиилээн киирсиэхтэрэ.