Ураты дьүһүннээх бөрөнү бултаатылар (ВИДЕО)

Быйыл Саха сирин үгүс нэһилиэктэрин ардай аһыылаахтар буулаатылар. Хастыы да сылгыны охторон, хаһаайыттарга улахан хоромньуну таһаараллар. 

Бөрөлөрү сорсуннаах булчуттар эрэ сонордоһор кыахтаахтар. Былырыын кыһыҥҥыттан Бүлүү улууһун I Күүлэт нэһилиэгин сылгыларын бөрөлөр буулаабыттар. Бу күннэргэ нэһилиэк сорсуннаах булчута Василий Васильев (Лиэп Бааска) ураты бөрөнү бултаата. Уратыта диэн сырдык дьүһүннээх. Маннык бөрөнү атыннык полярнай дииллэр эбит.

Ол туһунан ыйыталаспыппытыгар, «I Күүлэт аттыгар бу бөрө былырыын күһүн биэлэртэн убаһалары араарыы бүтэрин саҕана кэлбитэ. Маҥнай утаа ууга түспүт биэни булан сии сылдьыбыта. От тиэйиитэ уонна сылгы киллэриитэ саҕаланан тыаһыргаан баран хаалбыта. Ый курдук сүтэн баран, «Күүлэт» кэпэрэтиип биир үөр тыйдарын харахтаммытынан кэлбитэ. Дьэ уонна биир-биир охторбутунан барбыта. Үөрүйэҕэ, күүһэ-күдэҕэ сүрдээх буолан, адьас саанан ытар курдук охтортуур эбит этэ. Инньэ гынан ол үөртэн түөрт тыйы охторор, иккитин бэлиэтээбитин тута нэһилиэккэ киллэрбиттэрэ.  Адьырҕа кыыл сойуолаһарбын, ир суолан ирдиирбин  билэн, олус  сэрэнэр аҕай этэ.
Хас да сылгыны халымыр соҕустук  оһоллоон, үгүс киһи сыспай сиэллээхтэрин дьиэ таһыгар киллэрэргэ күһэллибиттэрэ. Салгыы икки биэни тырыта тыыппыта, биирэ хаана баран өлбүтэ. Тыыннаах хаалбыты тиэйэн аҕалбыттара. Ол кэннэ өссө биири хайыта тыыппытын сылгыһыт баазаҕа киллэрбитэ.

Дьон кэлэрэ-барара элбээбититтэн тэһииргээн, эрдэ охторбут сиэннэригэр бараары, сискэ уурбут хапкааммар үктээн биэрдэ. Өй хаата эрээри, хата, алҕаһатан киирэн биэрдэ ээ. Маннык дьүһүннээх бөрөнү үсүһүн бултаатым», — диэн кэпсээтэ.

Салгыы видео-устууну  көрүҥ.