Идэҕэ туһаайыы эрэгийиэннэр икки ардыларынааҕы бастакы тэрээһинигэр ыҥыраллар

Дьокуускай куоракка “Идэҕэ туһаайыы-2024” (“Профориентация-2024”) үөрэх миэстэлэрин уонна идэлэрин эрэгийиэннэр икки ардыларынааҕы быыстапка-дьаарбаҥка бастакы түһүмэҕэ ыытыллыаҕа.  

Тэрээһиҥҥэ дойду үрдүк уонна орто үөрэҕин кыһалара түмсэн эһиил үөрэххэ туттарсааччыларга сүбэ-ама биэриэхтэрэ. Оскуоланы бүтэрээри сылдьааччылар эксээмэни талыы, эксээмэҥҥэ бэлэмнэнии туһунан билсиэхтэрэ, эрдэттэн идэҕэ туһаайар эспиэрдэр сүбэлэрин ылыахтара. Тэрээһин сэтинньи 5 күнүгэр “Кружало” атыы эрээттэригэр сарсыарда 10 чаастан саҕаланыаҕа.

Урукку өттүгэр бу курдук сыл инниттэн бэлэмнээһин суоҕа. Онон абитуриент эрдэттэн билсэригэр, чопчу туттарсар үөрэҕэр ирдэнэр эксээмэннэри таларыгар туһалаах тэрээһин диэн бэлиэтиир тоҕоостоох.