ИДьМ миниистирэ ууттан киһини быһаабыт полиция үлэһитин наҕараадалаата

РФ Ис Дьыалаҕа миниистирэ Владимир Колокольцев полиция патрульнай-постовой сулууспатын туспа батальонун бочуоттаах үлэһитэ, полиция старшай сержана Прокопий Кириллины «Быыһабылга хорсунун иһин» мэтээлинэн наҕараадалаата.

Өрөбүл күн Прокопий Кириллин доҕорун кытта Кангалассы бөһүөлэк аттыгар балыктыы тахсыбыт.

Ол сылдьан ууга түспүт кырдьаҕас киһини көрбүт. Полиция старшай сержана тутатына көмөлөһө сүүрбүт. Кини ууга түспүт киһиэхэ сэрэнэн сыыллаан тиийбит уонна ууттан таһаарбыт. Ол кэннэ быыһаммыт эр киһини массыынатыгар олордубут. Мэдиссиинэ көмөтүттэн эр киһи аккаастаммыт. Эмсэҕэлээччи кэргэнэ уонна уола полиция старшай сержаныгар хорсун быһыытын иһин истиҥник махтаналлар.

«Прокопий Кириллин кэргэннээх, үс оҕолоох. РФ Сэбилэниилээх күүстэригэр суһал сулууспа кэмигэр Тихоокеанскай флотка матростаабыт», — диэн РФ ИДьМ официальнай бэрэстэбиитэлэ Ирина Волк иһитиннэрдэ.