СЭРЭНИҤ! Түөкүттэр оҕолору албынныыр саҥа схемалара тахсыбыт

Түөкүттэр учуутал буолан, оскуола оҕолоругар эрийэн, электроннай сурунаалы саҥардабыт диир буолбуттар.

СМС-нан кэлэр коду оҕонон этиттэрэллэр, итиэннэ ол нөҥүө “Госуслугаларга” киирэр кыахтаналлар диэн ИДьМ сэрэтэр.

Маны ааһан оскуола дириэктэрин, учууталын курдук туттан, төрөппүттэргэ эрийэн, электроннай сурунаалы, “Сферумҥа” үөрэнээччи профилын, үөрэнээччилэр испииһэктэрин саҥардыахха наада дииллэр. Итини оҥороллоругар хара санаалаахтар оскуола үлэһиттэрин дааннайдарын, дипфейк технологияларын уонна сымыйа нүөмэрдэри туһаналлар диэн биэдэмистибэ иһитиннэрдэ.

Оҕоҕо эрийэн, оскуолаттан эрийиэхтэрэ диэн сэрэтэллэр. Оттон үөрэнээччини кытары кэпсэтэ олорон, смс-нан кэлэр нүөмэри эт диэн итэҕэтэллэр. Ол кэннэ “Госуслугаҕа” киирэн, төрөппүт аатыгар кирэдьиит ылыахтарын сөп.

“Сферумҥа” эппиттэринэн, платформаҕа барар уларыйыылар үһүс сирэй кыттыыта суох саҥардыллаллар. “СМС-кодтар, ол иһигэр “Госуслугалар” кодтара манна туттуллубаттар”, диэтилэр.