ИДЬМ үлэһиттэрэ түөкүттэр ордук туһанар ньымаларын кэпсээтилэр

ИДьМ үлэһиттэрэ ордук тарҕаммыт дьону-сэргэни албынныырга түөкүттэр туһанар сэттэ көрүҥ ньымаларын кэпсээтилэр. Ол иһигэр, үп-харчы эйгэтигэр өҥө оҥорууну, инвестициянан харчыны үлүннэриини, счетчиктары уларытыыны уонна чэпчэки сыанаҕа кыбартыыраны куортамҥа биэриини ааттыыллар. Бу туһунан ИДьМ пресс-сулууспата иһитиннэрэр.

«ИДьМ сулууспатыгар түөкүттэр тарҕатар сэттэ көрүҥ ньымаларын быһаардылар. Бу – үп-харчы эйгэтигэр өҥөнү оҥоруу, түргэн займнар, барыстаах инвестициялар, иэс төлөбүрүн төнүннэрии, түргэнник харчы «баһан» ылыы, счетчиктары бэрэбиэркэлээһин, сантиэхиникэни уонна электромонтажнай үлэлэри ыытыы, чэпчэки сыанаҕа кыбартыыраны куортамҥа биэрии, ыксаллаахтык дьиэни-уоту атыылааһын, биэнсийэлээхтэргэ көмө оҥоруу, чэпчэтиилэринэн туһаныы эбэтэр кэмпэнсээссийэни ылыы, субсидия докумуонун оҥоруу, ырыынак сыанатыттан чэпчэкигэ табаары атыылааһын (бытовой тиэхиньикэ, электроника, массыына), дьиэ чаттарыгар киирэргэ QR-куодтары тарҕатыы, — диэн ИДьМ иһитиннэриитин ТАСС суруйар.

Түөкүттэр угаайыларыгар киирэн биэрии түгэнэ элбиир. Бу иннинэ биэдэмистибэ маркетплейстарга үлэ биэрэбит диэн кубулунан тус дааннайдары уонна дьон куодтарын хомуйар түөкүттэр элбээбиттэрин туһунан сэрэппитэ. Ону кытта аферистар баан эбэтэр «техподдержка» үлэһитэ буолан кубулунан,  ыраахтан олорон настройкалыырга араас бырагыраамалары туруорга уонна тус информацияны ыытарга күһэйэллэрэ биллибитэ.