Ньурбаҕа иэдээҥҥэ түбэспит булчуттары быыһаатылар

Бэҕэһээ, ыам ыйын 8 күнүгэр, СӨ Быыһыыр сулууспатын Ньурбатааҕы көрдүүр-быыһыыр этэрээтин быыһааччылара Мэҥэдьэк диэн сиртэн ыарыһаҕы аҕалар дьайыылары оҥордулар. Бу сир Ньурба куораттан 10 км тэйиччи Бүлүү өрүс нөҥүө турар диэн СӨ Быыһыыр сулууспатын пресс-сулууспата иһитиннэрэр.

Икки эр киһи хас да хонуктааҕыта бултуу барбыттар. Онтон биирдэстэрэ эмискэ ыалдьан, доҕоро быыһааччылары ыҥырбыт.

Ньурбатааҕы этэрээт быыһааччылара Бүлүү өрүскэ модьоҕо муус мэһэйдиир буолан, вездеходунан сатаан туораабатахтар. Онон тыынан өрүһү туораан, ыарыһах баар сиригэр сатыы хааман тиийбиттэр.

Быыһааччылар ыарыһаҕы нөҥүө биэрэккэ этэҥҥэ аҕалбыттар, «Суһал көмө» массыынатыгар тиэрдибиттэр.

Бу дьайыылар кэннилэриттэн кинилэргэ өссө биир суһал иһитиннэрии киирбит. Бүлүү өрүскэ тыы түҥнэстэн, икки булчут ууга түспүттэр. Кинилэр биэрэги булан бараннар, 112 нүөмэринэн көмөҕө ыҥырбыттар.

Быыһааччылар түүнү быһа эмсэҕэлээччилэргэ тиийэ сатаабыттар, Куотту өрүс мууһа хойуутук уста турар буолан мэһэйдэри үөскэппит. Ол да буоллар, быыһыыр бөлөх нөҥүө туораан бу дьону булбут. Бүгүн 10:55 ч. дьону булан, төннөн эрэллэрин туһунан иһитиннэрбиттэр диэн СИА суруйар.