Иэйэхсит Хотуну хаарынан оҥордо

Быйыл Иэйэхсит сыла үүннэ. Сунтаар улууһун Хаданыгар олорор уран уус Иннокентий Иванов үгэс курдук, сыл бэлиэтин — Иэйэхсит Хотуну хаарынан чочуйан оҥордо.

Хадан Киэсэтэ сыл аайы хаарынан ураты оҥоһуктары оҥорон, биир дойдулаахтарыгар бэлэхтиир. Кини илиҥҥи гороскобунан буолбакка, сахалыы халандаар бэлиэлэрин оҥорор идэлээх. Былырыын Айыыһыт Хотуну оҥорбута киэҥ биһирэбили ылбыта. Оҥоһугун чочуйан, кырааскалаан баран, үгэс курдук, ахсынньы 31 күнүн киэһэтигэр эрэ арыйар, көрдөрүүгэ таһаарар. Хаарынан оҥоһугун икки нэдиэлэ кэриҥэ оҥорор, кырааскалыыр. Өҥүн-дьүһүнүн табан дьүөрэлиир.

Оҥоһуктары анаан көрө, хаартыскаҕа түһэ кэлэллэр. Сылга тыһыынча кэриҥэ киһи сылдьар диэн дьиэлээхтэр этэллэр.

Маастар оҥоһуга, нууччалыы эттэххэ, «художественная композиция» буолар — кытыытынан сүрүн уобараһы арыйар, көмөлөһөр оҥоһуктардаах. Холобур, Иэйэхсит Хотун тула көмөлөһөөччүлэрин — кыыллары, көтөрдөрү, уйгу-быйаҥ бэлиэтин — сахалыы иһиттэри оҥорбут. Иэйэхсит Хотун майгытын, санаатын эмиэ көрдөрбүт — мичилийэн, үөрэн-көтөн, дьоҥҥо көмөлөстөрбүн, куустарбын ханнык диэбиттии илиитин даллатан турар. Таҥаһа-саба сиэдэрэй, мааны.

«Иэйэхсит сылын ис хоһооно, кылгастык этэр буоллахха, саас ыам ыйыгар сөп түбэһэр диэн. Көтөр, чыычаах кэлиитэ, от-мас тыллыыта, үрүҥ ас дэлэйиитин бэлиэтэ. Аал-Луук маһа хатыҥ диэн эбит, аны таптыыр кыыллара — туртас уонна куба. Иэйэхсит араҥаччылыыр, сэрэтэр, оҕо-уруу, ыччат тэнийэрин түстүүр», — диэн Иннокентий санаатын үллэһиннэ.

Маны тэҥэ, кини сиэмэнтэттэн скульптуралары эмиэ оҥорор. Олоҥхо дьоруойдарын чочуйан, оҥорон, быйыл көрдөрүүгэ таһаарда.