«Иэйии» 5 сыллаах биһирэмэ

Айар куттаах суруйааччылар ахсынньы 7 күнүгэр аам-даам тымныыны аахсыбакка ахсынньы аргыарын ортотунан «Ника» уораҕайга ыраахтан ыалдьыттаан, чугастан чуоҕуһан, көх-нэм буола көтөҕүллэн кэллилэр.

Алгыс тылынан арчылыы, эҕэрдэ эриэккэһин этэ, этэн-тыынан кэҕийэн, этигэн хомустарын дьүрүһүтэн, дьикти абылаҥҥа куустардылар. Харыйа тулата барыта дьикти сыдьаайынан сандааран, кэрэчээн лабаатынан сапсыйан, дьиримнии-чыпчыҥныы көрүстэ.
Имнэрэ кыыһа тэтэрбит кэрэ бэйэлээх Далбар Хотуттар, күүстээх аҥаардар, сэгэйбит,  сэргэхсийбит сирэйдэр толору астаах сандалыларга тустаах олбохторугар миэстэлэрин булуннулар.
Үөрүү-көтүү өрөгөйүгэр «Иэйии» КСК салайааччыта Афанасьев И.И., солбуйааччыта: СӨ муниципальнай сулууспатын туйгуна, Игидэй нэһилиэгин сайдыытыгар Анал бэлиэ хаһаайката Жулева Александра Семёновна-Суһума тыл этиилэринэн, эҕэрдэлэринэн саҕаланна.
Бастатан туран, ыалдьыттары эҕэрдэлээн, махтал тыл маанытын эттилэр. Үтүө дьонноругар дьоллоох дьоһун киэһэҕэ хаһан да умнуллубат үтүө өйдөбүнньүктэри туттартаатылар. Түмсүү сайдыытыгар үрдүк көрдөрүүлэрин иһин Фёдорова С.С.-Саргылаана Сайыҥҥа туттардылар.
Ити курдук үрдүк таһаарыылаах үлэлэрин иһин: Иванова Г.И.-Айтыына Уран, Сергеева Н.Е.-Аана Кыыһа, Бочкарёва-Иннокентьева А.С.-Сууралдьыма Куо, Поскачина М.Е. наҕараадалары туттулар. Түмсүү көхтөөх кыттыылаахтарынан Иванова С.-Санаара, Николаева Т.И.-Сарыада, Баишева М.А.-Сайдыына, Захарова А.Н-Уһуйаана, Олесова А.Н.-Айталыына, Николаева И.Н-Угинка ааттаннылар.
Ону сэргэ анал ааттар иҥэрилиннилэр:
«Хомоҕой хоһоонньут» — Антонова Е.П.-Күн Сиккиэригэр, Николаева Т.И.-Сарыадаҕа, Васильев И.А.-Ылдьаа Хоточчуга, Кычкина М.-Ситим Кутка, Хабарова Айталинаҕа-Айталыга.
СӨ Судааарыстыбаннай мунньаҕын (Ил Түмэн) наҕараадатынан  Борисов А.А-Мичээр, Махтал суругунан Ющенко А.Ф.-Алгыстаана бэлиэтэннилэр.
Поскачина М.Е. «СӨ култууратын туйгуна» ааты ылла. Килбиэннээх мэтээллэринэн наҕараадаланна: «Иэйии» КСК салайааччыта Афанасьев И.И-Алмаас.
«Сахалыы тыыннаах
Ийэлии истиҥ сыһыаннаах
Саха тыла сайдарын туһугар
Сахалыы куттаах
Саха тылын сүмэтин сөлөгөйүн ис тыыннарыгар иитиэхтээн,
Саргылаах саха саҥатын
Сөрүүн сүөгэйи ыймахтыырдыы сайгыччы саҥаран,
Ийэлии иһирэх итии-сылаас сүүрээнигэр угуттанан
Кыынньа сылдьар кымыһын ыймахтаан,
Кылыгырас сүмэтиттэн амсайан,
Кылыһахтаах ырыатыгар уйдаран,
Дьээ-буо дьиэрэҥ тэйсэн
Түһүлгэбит дьоро күнэ саҕаланна».
Бу киэһэ «Иэйии» түмсүү хоһоонньуттарын, ааптардарын тылларыгар ылбаҕай ырыалар ылланнылар. Ол иһигэр, үрдүк категориялаах стоматолог-быраас, стоматология туйгуна, үс кинигэ ааптара, хоһоон айааччылар өрөспүүбүлүкэтээҕи күрэстэрин лауреата, дипломана, Гран-при хаһаайката, 2025 с. «Эн Сулускун 50+» ырыа бырайыагын кыттыылааҕа, 10-ча ырыалаах, «Ситим» сойуус кыттыылааҕа Бережнова Мария-Тупсууна.
Байды бэйэтин аатыгар дьүөрэлэһэр имигэс тупсаҕайкаан бэйэлээх хамсаныылаах үҥкүүлэрэ барыларын сэргэхситтэ, үҥкүү алыбыгар куустарда, Винокурова Василисса Васильевна оһуохайга ойутта, эһиэхэйгэ эргиттэ, 80 сааһын ааспыт диэтэххэ, эдэрдии эрчимэ сөхтөрдө.
Хабарова Августина Семёновна «Таммахтар» түмсүү аатыттан бэрт кэрэхсэбиллээх оһуохай тылын этэн, тэтимнээх үҥкүүгэ тэлээртэ.
«Иэйии» сүбэтин аатыттан Махтал суругу «Ситим» көҥүл суруйааччылар сойуустарын хомоҕой хоһоонньуттарыгар Неустроев П.П.-Айаанньа Ууска, Уварова Е.Н.-Чуохаанаҕа, Григорьева Анна Петровнаҕа, Санникова Вераҕа-Мичийээнэҕэ, Бережнова Марияҕа-Тупсууна Байдыга Жулева Александра Семеновна-Суһума үөрүүлээх быһыыга-майгыга туттарда.
Аны түмсүүлэр эҕэрдэлэрэ үрдүк таһымнаахтык барда. «Ситим» кыттыылаахтара түмсүүнэн тахсан эҕэрдэ, алгыс тылын эттилэр,
Ыҥырыылаах ыалдьыттар бастыҥ мааны минньигэс астаах сандалыга олорон, үчүгэйкээн бэйэлээх кэнсиэри көрдүлэр.
Уварова Е.Н көрдөөх кэпсээнинэн сценарийын бэйэтэ суруйан, көрдөөх сценканы оонньообуттара өссө ордук кэрэхсэбиллээх буолла.

Е.Н. УВАРОВА-ЧУОХААНА