Игнатьевтар дьиэ кэргэн өрүү холобурга сылдьаллар

Сунтаар улууһун Арыылаах нэһилиэгин ытык кырдьаҕастара, Сунтаар улууһун Бочуоттаах олохтоохторо, кэргэннии Татьяна Алексеевна уонна Николай Иванович Игнатьевтар биир дойдулаахтарыгар мэлдьи холобур буолаллар.

Төһө да куоракка олордоллор, сайын буолла да дойдуларыгар сынньаналлар. Нэһилиэк, улуус култуурунай олоҕор мэлдьи кытталлар. Атырдьах ыйын 28 күнүгэр Бүтүн Арассыыйатааҕы «Матери России» хамсааһын көҕүлээһининэн, Арыылаахха саха норуодунай бэйиэтэ Леонид Попов аатынан искибиэргэ субуотунньук уонна мас олордуута буолан ааста. Татьяна Алексеевна уонна Николай Иванович тэлгэһэлэригэр үүнэн турар тэтиҥнэрин илдьэн олортулар. Оттон Иван Наумов уонна Александр Афанасьев бузина маһы олортулар. Онон бэйиэт аатынан искибиэр саҥа мастарынан киэркэйдэ.

Игнатьевтар дьиэ кэргэттэрэ дойдуларыттан элбэх сонуннаах, дуоһуйа сынньанан куоракка кыстыы кэлиэхтэрэ.

Марта Николаева