Роман Дмитриев турнирыгар саха спортсменнара 9 мэтээлгэ тигистилэр

Саха сирин сүүмэрдэммит хамаандата олимпийскай чөмпүйүөн Роман Дмитриев аатынан XI норуоттар икки ардыларынааҕы көҥүл тустууга турнирга 21 саастарыгар диэри эдэр спортсменнар ортолоругар икки кыһыл уонна икки үрүҥ көмүс, ону тэҥэ биэс боруонса мэтээли ыллылар.

Ил Дархан Айсен Николаев турнир тэрийээччилэригэр уонна кыттааччыларыгар махтанна.

«Турнирга 8 тас дойдуттан уонна дойду 13 эрэгийиэниттэн 270-тэн тахса эдэр спортсмен кытынна. Бу күннэргэ успуорт доҕордоһуу дьиҥнээх бырааһынньыгынан буолла уонна успуорт чахчы сомоҕолуурун өссө төгүл дакаастаата. Саха сирин сүүмэрдэммит хамаандатын тустууктара өрөспүүбүлүкэ чиэһин үчүгэйдик көмүскээтилэр — 9 мэтээлгэ тигистилэр», — диэн бэлиэтээтэ Айсен Николаев

Саха спортсменнара икки ыйааһыҥҥа бастакы миэстэни ыллылар. Саха сиригэр  бастакы кыһылы көмүс мэтээли хамаандаҕа Евгений Аронов аҕалла. Кини 97 кг ыйааһыҥҥа финальнай хапсыһыыга 2:0 ахсаанынан Монголия бөҕөһүн Лхагвадоржа Тумэнжаргала кыайда.

70 кг диэри ыйааһыҥҥа Саха сириттэн иккис кыһыл көмүс мэтээли Игорь Матвеев ылары ситистэ. Финалга Казахстан тустуугун кыайбыта.